Kuxwayiswa abashintshe izinombolo zezingcingo
BAZOBA senkingeni abafundi abashintsha izinombolo zomakhalekhukhwini abazisebenzise ngesikhathi befaka izicelo zoxhaso esikhwameni iNational Students’ Financial Aid Scheme (NSFAS) njengoba kuyizo abazothola kuzo izimpendulo zokuthi bayaxhaswa noma abaxhaswa.
Abalesi sikhwama banxuse abafundi ukuthi bangazishintshi izinombolo zocingo ukuze kube lula ukuxhumana nabo ngendaba yoxhaso.
Isikhulu esiphezulu salesi sikhwama uMnuz Steven Zwane, sithe bathole izicelo zoxhaso ezingu-267 866, ezingaphezulu kuka-100 000 ezabafundi abebefaka izicelo zoxhaso okokuqala. Uthe uhlelo lokufaka izicelo aluzange lubanike izinkinga, bamatasa bacubungula zonke izicelo abazitholile.
“Siyanxusa, ikakhulu kubafundi abafake izicelo ukuthi bangazishintshi izinombolo zabo ngoba labo abenza u-matric kulo nyaka sizobathumelela imiqhafazo ngoJanuwari 2018. Sizobe sibazisa ukuthi balutholile yini uxhaso lokufunda.”
Bethula umbiko ekomitini lezemfundo ePhalamende abalesi sikhwama bathe bangu-118 128 abesifazane abafake izicelo zokuxhaswa, abesilisa babengu-74 854.
Abalesi sikhwama bathe bathole izicelo zabafundi abangu-21 699 abahola imali yesibonelelo evela kuhulumeni, abafunda ezikoleni ezingoQuintile 1 kuya ku-3 (izikole okungakhokhwa imali yokufunda kuzona).
Kwenzeka lokhu nje uMengameli Jacob Zuma umemezele ukuthi kuzoqala imfundo yamahhala uma kuvulwa emanyuvesi ngonyaka ozayo kulabo abahlwempu.
UZuma uthe labo abaxakekile, abazali babo kumele kube ngabahola ngaphansi kukaR350 000 ngonyaka uma kuhlanganiswe imiholo yabo. Labo abazali babo abahola uR600 000 kuya phansi ngonyaka ngeke banyuselwe imali yokufunda emanyuvesi bazokhokha imali abebevele beyikhokha. Abafundi abafunda emakolishi amakhono amaTechnical Vocational Education and Training nabo bazofunda mahhala kusuka ngonyaka ozayo.
UZuma uthe iNSFAS yiyona ezoqhubeka nokuxhasa abafundi ngemali yokufunda emanyuvesi.
Lesi simemezelo sikaZuma samukelwa ngo-elethu yizinhlangano zentsha ezathi liphume nobomvu njengoba bezilokhu zikhala ngokuthi kumele kube nemfundo yamahhala kuleli.
UNgqongqoshe wezeziMali uMnuz Malusi Gigaba nguyena ozokhuluma kabanzi ngokuthi imali yokuxhasa le mfundo izoqhamukaphi, uma esethula isabelo sezimali ngoFebhuwari wonyaka ozayo.