Usezicelele imkhulule iBucs uGcaba ebhentshini
UFAKE isicelo sokushiya kwiOrlando Pirates u-Ayanda Gcaba olizwa ngendaba ijezi kuleli qembu.
Isolezwe lihabule lezi zindaba ngomthombo walo ongashayi eceleni ukuthi uGcaba usekhathele yibhentshi.
“UGcaba usayithanda iPirates kodwa inkinga yakhe wukuhlala ebhentshini. Yinto angayithandi-ke leyo. Ngaphambi kokuthi kuyiwe emaholidini kaKhisimusi ukhulumile nosihlalo weqembu (u-Irvin Khoza) wacela ukuthi akhululwe ngoba akadlali. Njengamanje uselinde iqembu ukuthi libuyele kuyena. Uvule izandla kunoma yiliphi iqembu elimfunayo,” kusho umthombo. UGcaba umiswe kabi nguJustice Chabalala, Gladwin Shitolo, Ntsikelelo Nyauza bonke abayibamba phakathi nenkundla emuva. Kuthintwa imenenja yakhe uMike Makaab weProSport International ukubeke kwacaca ukuthi uGcaba ufuna ukudlala. “UGcaba usalelwe yizinyanga eziyisithupha kwinkontileka yakhe nePirates. Uma ikhona indlela okungenziwa ngayo ukuthi athole ijezi singajabula. Uma leyo ndlela ichaza ukuthi kumele aye kwelinye iqembu elizomdlalisa singajabula. Into ayifunayo wukudlala. Ukuhlala ebhentshini akumsizi kodwa konke kuncike kwiPirates ngoba usengumdlali wayo,” kusho uMakaab.
UGcaba uke wamataniswa naMaZulu neMaritzburg United okungamaqembu aKwaZulu-Natal (KZN) okuyisifundazwe azalelwe kusona.
Lesi sitobha sifike kweZimnyama ngo-2012 sisuka kwiFree State Stars. KwiPirates sinqobe isicoco seNedbank Cup saphinde safinyelela kowamanqamu weCaf Champions League neCaf Confederation Cup.
UGcaba ukwazi ukudlala izindawo eziningi. Uyakwazi ukuyibamba phakathi nenkundla emuva nangakwesokunxele emuva.
Selokhu kufike umqeqeshi omusha uMilutin “Micho” Sredojevic akalitholi ijezi. Ukufika kukaDiamond Thopola kwiPirates kusho ukuthi uGcaba usazoqhubeka nokuba wukudla kwebhentshi uma ehlala ngoba uNtsikelelo Nyauza usezongena phakathi nenkundla emuva.
UThopola ujoyine iPirates ngesonto eledlule esuka kwiChippa United.