Bazobambisana namaphoyisa ngominzile
ABAHLELI bomcimbi owaziwa ngeDurban Jazz Festival eba seHazelmere Dam sebeveze ukuthi bazosebenzisana namaphoyisa ophenyweni lwawo ngemuva kwesigameko sokudlula emhlabeni kowesilisa ocwile kuqhubeka lo mcimbi ngoDisemba 26.
USandile Mbhense (31), okade eyingxenye yezihambeli ezazikulo mcimbi watholwa entanta osebeni lwaleli damu.
Esitatimendeni abasikhiphile abahleli bomcimbi baveze ukuthi lesi sigameko sibashiye bedumele futhi bezwa ubuhlungu obukhulu.
“Sikhalisana nomndeni ngalesi sikhathi esinzima. Ukudlula komuntu emhlabeni yinto engelula kunoma yimuphi umndeni futhi adlule ngale ndlela,” kuchaza abahleli bomcimbi.
Bathe bathuke kakhulu ukuzwa ngalesi sigameko njengoba eminyakeni engu-15, selokhu kwaqala lo mcimbi akukaze kube nesigameko esinjengalesi.
“Sihlale siqikelela ukuthi siqasha onogada abawaziyo umsebenzi wabo ukuze baqaphe yonke into eyenzakalayo uma kuqhubeka umcimbi.
Izihambeli zethu zisuke zibaluleke kakhulu,” kusho bona.
Bathe okwamanje akukho okuningi abazokuphawula ngalesi sigameko konke bazokuyekelela emaphoyiseni.
Umngani kamufi uNgcebo Mdima odume ngokusebenzisana nosaziwayo, uthe okwamanje akukho okusha abasakutholile selokhu kwenzeka isigameko.
UNgcebo uthe umngcwabo kaSandile uzoba eMthwalume ngeSonto, inkonzo yesikhumbuzo izoba KwaMashu ngoLwesihlanu ehholo lomphakathi kwa-C.