Ikhansela le-ANC libulewe ebhishi
LIGWAZWE lafa ikhansela le-ANC eJozini ngemuva kwengxabano ngesikhathi lisebhishi nomndeni walo eRichards Bay ngoMsombuluko.
UMnuz Njabulo Dlamini (39) obeyikhansela ku-ward 2 eJozini kuthiwa ubezikhiphile nomndeni wakhe ngesikhathi kwehla lesi sigameko.
Ngaphandle kokuba yikhansela, uDlamini ubebuye abe nguthishanhloko eBukimvelo High khona eJozini.
UNobhala we-ANC esifundeni iFar North, uMnuz Nkosingiphile Mlambo obesondelene kakhulu noDlamini, uchaze umufi njengomuntu obekhaliphile futhi ehlonipha.
“Silimele kakhulu ngokushona kukaDlamini, siyazibuza siyaziphendula ukuthi bekwenzenjani embandakanyeka engxabanweni eholele ekutheni abulawe ngoba ubengumuntu ozithulelayo,” kusho uMlambo.
UMlambo uthe uDlamini ubengumuntu ozibophezele ekusebenzeleni umphakathi.
“Ubefundile enguthisha kodwa wakhetha ukuthi abe yikhansela ngoba ethanda ukusebenzela abantu,” kusho uMlambo.
Uthe bekuyihlandla lakhe lokuqala uDlamini eyikhansela kodwa umsebenzi wakhe ubusuqalile ukubonakala.
Imenenja yoMkhandlu waseJozini, uMnuz Kuhlekonke Khumalo, ithe bashayeke udume ngokushona kukaDlamini.
NoKhumalo uchaze uDlamini njengendoda ebihlakaniphile futhi ewuthanda umndeni wakhe.
“Ubehlale ewukhipha umndeni wakhe ngisho nangesikhathi ehlelwa wumshophi ubekade ezikhiphile nomndeni bese Richards Bay,” kusho uKhumalo.
UNgqongqoshe wezokuBusa ngokuBambisana nezindaba zoMdabu KwaZulu-Natal, uNkk Nomusa Dube-Ncube, uzwakalise ukushaqeka nokudumala ngokudlula emhlabeni kukaDlamini.
“Yize imbangela yokubulawa kukaDlamini ingakaziwa kodwa njengomnyango sinxusa iziphathimandla zomthetho ukuba zisebenze kanzima ukuze kubanjwe ababulali,” kusho uNkk Dube-Ncube.
UNkk Dube-Ncube udlulise amazwi enduduzo emndenini wathi amalungiselelo okungcwatshwa kukaDlamini azokwaziswa umphakathi uma sebehlangane nomndeni.
Okhulumela amaphoyisa KwaZulu-Natal, uColonel Thembeka Mbele, uthe amaphoyisa aseRichards Bay aphenya icala lokubulala ngemuva kokuthi owesilisa oyikhansela eJozini egwazwe wafa ebhishi e-Alkastrand eRichards Bay ekade ezikhiphile nomndeni wakhe.
UMbele uthe imbangela yokuhlaselwa kukaDlamini ibingakaziwa.