Belizibhubhela izigebengu amaphoyisa eshaqa kwani
AMAPHOYISA ase-Eastern Cape abophe abantu abangu-832 ngamacala ahlukene esikhathini esingangesonto ngamaholidi kaKhisimusi.
Okhulumela amaphoyisa kulesi sifundazwe, uColonel Sibongile Soci, uthe esikhathini esingangesonto amaphoyisa athole izinhlamvu ezingekho emthethweni ezingu-72 nezibhamu ezingekho emthethweni ezingu-14.
Uthe abasolwa abaningi baboshelwe amacala okugqekeza, ukubamba inkunzi nokuduna izimoto. Abasolwa bazovela ezinkantolo ezehlukene esifundazweni.
“Umkhankaso obuwenziwa ngamaphoyisa ngalesi sikhathi samaholidi uze nezithelo ezinhle futhi wenza isiqiniseko sokuthi umphakathi nezivakashi baphephile,” kusho uColonel Soci.
Uthe bazibophezela ekwenzeni isiqiniseko sokuthi isifundazwe sabo siphephile.
Khona manjalo amaphoyisa aseWestern Cape abophe abantu abangaphezu kuka-10 000 ngamacala ahlukene kusukela kuqale amaholidi kaKhisimusi.
Iningi ababoshwe esifundazweni ngokutholakala nezidakamiza nezibhamu ezingekho emthethweni. Okhulumela amaphoyisa kulesiya sifundazwe, uCaptain Novela Potelwa, uthe ubuningi bamaphoyisa abetshaliwe yikhona okuholele ekuboshwe kwezinkulungwane zabantu.
Uthe kubasizile futhi nokuba khona kwamaphoyisa aqhamuka kuzwelonke. Isifundazwe iWestern Cape sidume ngezinga eliphezulu lobugebengu, ikakhulukazi bokushushumbiswa kwezidakamizwa nezimpi zamaqembu ezigelekeqe esezibulale abaningi.
UKhomishana wamaPhoyisa kulesiya sifundazwe, uLtGeneral Khombinkosi Jula, uthe benza konke okusemandleni ukuqinisekisa ukuthi isifundazwe siphephile.
UJula oqhamuka KwaZulu-Natal ufunge wagomela ukuthi bazogcina bebunqobile ubugebengu endaweni yabo.