‘Ngeke bamukelwe abafundi abangabhalisanga’
BASENKINGENI abafundi abangazifakanga izicelo zokufunda emanyuvesi kulo nyaka njengoba bengeke bamukelwe uma betheleka bethi bazobhalisa.
Lesi sexwayiso sikhishwe yinhlangano emele amanyuvesi angu-26 akuleli i-Universities South Africa (USAF) kulandela inkulumo yomholi we-EFF, uMnuz Julius Malema, othe abafundi abaphasa u-matric abaye kobhalisa emanyuvesi kulandela isimemezelo sikaMengameli Jacob Zuma sokuthi abahluphekayo bazofunda mahhala.
Le nhlangano isixwayise abafundi ukuthi bangazami ukuziyela emanyuvesi uma bengazifakanga izicelo kodwa kumele babhalise kwiCentral Applications Clearing House (CACH).
USolwazi Ahmed Bawa, isikhulu sale nhlangano, uthe bahlanganile ngoDisemba 16, ukubhunga ngesimemezelo sikaZuma semfundo yamahhala kulo nyaka.
Uthe bavumelana ngokuthi njengoba izicelo zokufunda zavalwa nyakenye abekho abafundi abazokwamukelwa abazofika bethi bazobhalisa bengazifakanga izicelo.
“Amanyuvesi kumele alandele imigomo yokwamukelwa kwabafundi ngokuvumelana phakathi kwawo noMnyango weMfundo ePhakeme. Sikhathazekile ngezitatimende ezenziwa abaholi bezepolitiki mayelana nokuthi abafundi abaphasa abathutheleke emanyuvesi bayobhalisa njengoba sekukhona le mfundo. Lezi zitatimende zingenza ukuthi kuphinde kube nesehlakalo esibi esenzeka ngoJanuwari 2012 lapho kwashona khona umzali ngemuva kokunyathelena enyuvesi yaseGoli,” kusho uBawa.
Uthe kumele manje kusetshenziswane nabesikhwama iNational Students’ Financial Aid Scheme ukuze kusizakale abafundi.
UMalema unxuse labo bafundi abaphasa kodwa bangaqhubeka nokufunda ukuthi babuyele emanyuvesi bayofunda.
“Sinxusa bonke labo abaphasa ngamalengiso u-matric abasebenza ezitolo, abangonogada nabafaka uphethroli abebengakwazi ukufunda ukuthi babuyele emanyuvesi bayokhetha izifundo abazozenza,” kusho uMalema.
UZuma wathi labo abazali babo abahola ngaphansi kuka-R350 000 ngonyaka bazofunda mahhala ngoba bazofakwa ngaphansi kwabantu abahluphekayo.
UBawa uthe abafundi bangafaka isicelo sokufunda kwi-website ethi:www.cach.dhet.gov.za.
Uthe i-website izoqala ukusebenza ngoLwesihlanu.
“Nalabo abafuna ukwazi ngoxhaso lwesikhama iNSFAS bangaya kule website ukuze bathole usizo,” kusho uBawa.