Kuzoba nzima ukuya enyuvesi kosinde engozini eqeda ukubhala
AKABONI ukuthi uzokwazi ukuqala enyuvesi ekuqaleni konyaka umfundi waseRossburgh High eThekwini, owasinda beshayiswa yimoto nomngani wakhe beqeda ukubhala iphepha lokugcina likamatric.
USnenhlanhla Mabaso (19) waseLindelani, wayehamba nomngani wakhe uFelicia Letsatsi (20) waKwaMashu owashona esendaweni yengozi. Babebuya kobhala iphepha lesiNgisi ngoNovemba 27. USnenhlanhla utshele Isolezwe ukuthi akazi ukuthi kwenzekani kule ngozi eyenzeka kuM7 ngasenxanxatheleni yezitolo eRossburgh.
“Imoto yaqhamuka emuva kwethu igijima, angazi kwenzekani ngoba ngaphaphama esibhedlela. Omunye omdala esashayiseka naye nguyena okwazi ukuxoxa ngoba wabona konke,” echaza.
Yize abafundi bejwayele ukubhiyoza babhale nemifaniswano uma beqeda ukubhala, uSnenhlanhla uthi baphuma esikoleni baqonda esiteshini beyogibela noFelicia. Uthe bobabili babecobekile, ikakhulukazi umufi. Akazi ukuthi yini eyayibacobile ngoba nephepha lalingelukhuni. Njengoba abafundi belinde imiphumela ka-matric, uSnenhlanhla uthe unethemba lokuthi uzophasa futhi uyazi nomngani wakhe ubezophumelela. Ubhalisele ukuyokwenza izifundo zeManagement eDamelin kodwa kuyamphazamisa ukungalulami kahle. Uthe akavakashanga ngamaholidi ngoba akakwazi ukuzenzela izinto. Walimala emlenzeni wakhonkwa wafakwa nensimbi emuva kwengozi. Uveze ukuthi kumele aphindele esibhedlela ayofaka omunye ukhonkolo. Kumanje uhamba ngezinduku kanzima.
“Ngicabanga ukuthi ngiyoze ngikwazi ukuya esikoleni ngesigaba sesibili sonyaka. Indlela okusenzima ngayo ukuzihambela, angiboni ukuthi ngizobe sengiluleme,” kusho uSnenhlanhla.
Unina, uNkk Makhosi Mabaso uthe indodakazi yakhe yalala amasonto amabili esibhedlela kodwa bayabonga ukuthi yasinda kuleyo ngozi. Kuthiwa umshayeli wemoto wagcina eboshiwe waphuma ngebheyili, umndeni wakwaMabaso awukaze uye ecaleni. Esitatimendeni esithunyelelwe iphephandaba mayelana nale ngozi, uColonel Thembeka Mbhele okhulumela amaphoyisa esifundazweni waveza ukuthi kusolwa ukuthi umshayeli wahluleka ukulawula imoto, yaphaphalaza yashayisa abathathu. Uthe amaphoyisa aphenya icala lokubulala ngokungenhloso nelokuzama ukubulala.