Kwenyukile ukuphasa kuka-matric kwezizimele
LINYUKILE izinga lokuphasa kubafundi ababhale u-matric ngaphansi kohlelo i-Independent Examinations Board (IEB) lafinyelela ku-98.76% lisuka ku-98.67% wango-2016.
Ingxenye enkulu yabafundi abaphasile okungu-88% bazokwazi ukungena emanyuvesi, u-8% wona uzokwazi ukwenza ama-diploma kuthi u-1% ukwazi ukwenza amaHigher Certificate.
Abafundi ababalelwa ku-12 130 babhale lezi zivivinyo ezikhungweni ezingu-212 kuleli nezikwamanye amazwe akhelene nakuleli okuyiSwaziland, Mozambique neNamibia.
Kulaba abangu-11 464 babhale ngokugcwele kwathi abangu-666 babhala ngasese.
UNksz Anne Oberholzer, isikhulu esiphezulu se-IEB, uthe umkhandlu oqinisekisa izingabunjalo Umalusi uyiqinisekisile le miphumela.
“Abafundi bango-2017 benze ezibukwayo ezivivinyweni iNational Senior Certificate ngokuphumelela ngamalengiso.”
KwaZulu-Natal bangu-2 206 abafundi ababhale izivivinyo ngaphansi kohlelo i-IEB. Izikole ezibhala ngaphansi kwalolu hlelo ngezizimele.
“Ezinye zazo yiDurban Girls College, Crawford College nezinye. EGauteng bangu-6 546 abafundi ababhale ngaphansi kwalolu hlelo.
UNksz Oberholzer uthe uhlelo lokuphucula iMaths kubafundi luthele izithelo njengoba abafundi abevile ku-92% bephase lesi sifundo ngo-40% kuya phezulu.
Kulabo abafuna ukuphinde bamakelwe usuku lokugcina lokwenza lokhu uJanuwari 10. Imiphumela yokuphinde umakelwe izokhishwa ngoFebhuwari 5, kulo nyaka.
Labo bafundi abafuna ukubhala izivivinyo zokuchibiyela, usuku lokugcina uFebhuwari 12. Khonamanjalo uNgqongqoshe wemfundo eyisiSekelo uNkk Angie Motshekga, uzomemezela imiphumela yabafundi bakwamatric abebefunda ezikoleni zikahulumeni kusasa ntambama. UNkk Motshekga uzomemezela imiphumela yezifundazwe nekazwelonke bese ngoLwesihlanu oNgqongqoshe beminyango yezemfundo ezifundazweni bememezela imiphumela. Abafundi bazoyithola ngoLwesihlanu ezikoleni imiphumela yabo. UNgqongqoshe wezemfundo KwaZulu-Natal uMnuz Mthandeni Dlungwane uzomemezela imiphumela eThekwini e-Inkosi Albert Luthuli Convention Centre.