Besabisa ngokungqongqisa amahhovisi amaphephandaba
INHLANGANO yabafundi iCosas eGoli isabisa ngokuthi izowashisa amahhovisi amaphephandaba azokhipha imiphumela ka-matric kulo nyaka.
ICosas ithi ukukhishwa kwemiphumela ka-matric emaphepheni kufakela abafundi ingcindezi engenasidingo.
ICosas ikhipha lesi sexwayiso ngaphambi kokuthi kuphume imiphumela ka-matric kuleli sonto.
USihlalo wale nhlangano eGoli, uMnuz Wandile Mofokeng, uthe ukukhishwa kwemiphumela ka-matric emaphepheni kuqeda ukuzethemba kwabafundi.
“Abafundi bayaqhubeka nokulahlekelwa yithemba ngenxa yokukhishwa kwemiphumela yabo emaphepheni, isikhathi esiningi le miphumela iphuma inamaphutha amaningi,” kusho uMofokeng.
UMofokeng uthe ngeke bazibandakanye nomcimbi wokukhishwa kwemiphumela wuMnyango wezeMfundo uma izokhishwa nasemaphepheni. “Sizowashisa ngempela amahhovisi amaphephandaba azokhipha imiphumela ka-matric,” kusho uMofokeng. Unxuse abafundi ukuthi bahambe bayolanda imiphumela yabo ezikoleni. UDkt Melanie Hamasty osebenza esikhungweni iPsychMatters Family Therapy Centre eBedfordview, Ekurhuleni, uthe ingozi yokuzibulala kwabafundi inkulu ngemuva kokuphuma kwemiphumela.
“Inkulu ingcindezi yokuthi abafundi bazibulale ngalesi sikhathi sokukhishwa kwemiphumela, baningi abafundi abazibulele phambilini ngemuva kokuthola ukuthi abazange baphume emaphepheni,” kusho uHamasty.
Ike yavela naphambilini indaba yokuthi kuvalwe ukushicilelwa kwemiphumela ka-matric emaphepheni ngenhloso yokuqeda ingcindezi ebhekana nabafundi.
Izinhlaka eziningi zikholwa ukuthi ukuphuma emaphepheni kwemiphumela ka-matric kunomthelela ekutheni abanye abangaphumelelanga bazibulale.