Kungenwa ngoJuni ohlelweni lwe-digital
ZIZOSHINTSHA ngoJuni 2019 izinhlelo zokusakaza kwithelevishini nasemisakazweni zisuka kwi-analogue ziya kwi-digital.
Lezi zinhlelo zimenyezelwe nguMnuz Jackson Mthembu onguSihlalo wekomiti lezokuxhumana kwi-ANC.
UMthembu uthe kade uhulumeni aqala izinhlelo zokushintsha ukusakaza ukuze izithombe zicace bha nomsindo uzwakale kahle okubizwa nge-digital migration ngakho babeke umnqamulajuqu kaJuni 2019.
Uthe uhulumeni uzophinde alufakele izibuko uhlelo lokulawulwa kokusebenza kwezintatheli.
“Amalungu ePhalamende azodingida udaba lokuthi kufanele kube nesigungu esiqapha ukusebenza kwezintatheli ukuze uma ziphambukile ziqondiswe ubugwegwe noma zizoqhubeka nokuzilawula,” kusho uMthembu.
Uthe bazophinde babheke udaba lokuvaleka kwemakethe yeziteshi ezikhokhelwayo zethelevishini kwazise njengamanje kukhona inkampani eyodwa ekhokhisa abantu imali.
“Sonke siyazi ukuthi wobani abaphethe iziteshi zethelevishini ezikhokhelwayo. Kufanele kwande izinkampani ezikhokhelwayo kungasebenzi inkampani eyodwa,” kusho uMthembu.
Uthe bazovulela izinkampani ezifuna ukwakha izigubhu ezishintsha izithombe kwithelevishini ebezivalelwe ngaphandle ukuze kushintshe imboni yezokusakaza.
Uveze ukuthi bazofundisa amalungu abo ngokusebenzisa ngendlela efanele izinkundla zokuxhumana, bawafundise nangokuxhumana nezintatheli.
Uthe bazoba nabakhulumela i-ANC kuzwelonke, ezifundazweni nasezifundeni.