Ukhipha amaqoqo ezindala uDJ Bongz
UPHENDULE izikhalo zabalandeli bakhe uDJ Bongz othi bebemhlupha befuna izingoma zakhe ezindala njengoba eziqoqe ndawonye kwi-albhamu asanda kuyikhipha.
UBongz ukhiphe i-albhamu ethi Best Of DJ Bongz enezingoma ezingu-13. Phakathi kwazo kukhona ethi Sengihambile apike kuyo uNana, Fly Away okucula kuyo uMalethu, Thina Sobabili ayishaya noThab’sile nezinye.
“Ngibuyise zonke izingoma zami ezindala ezazishisa izikhotha ngoba bezingekho ku-iTunes nakoGoogle PlayStore. Abantu bebelokhu behlupha bezifuna ngoba bebengazitholi ndawo,” kusho uDJ Bongz.
Uthe kulo nyaka ubengazimisele ngokukhipha i-albhamu ephelele ngoba ukhiphe ezihamba ngazodwa.
“Engikwenzile kodwa wukuthi kuzo ezindala ngifake nezintsha ezinhlanu engizikhiphile njengoThanduxolo engiyenze noMondli Ngcobo, Kuruza nezinye. I-albhamu yami entsha ngizoyikhipha kahle ngonyaka ozayo,” kuchaza yena.
Uthe njengoba lena kungeyokuqala, usazolandelisa ngamanye ngonyaka ozayo.
“Nginezingoma ezashisa izikhotha eziningi kakhulu. Ungazidlala amahora amathathu. Yingakho kuza uVolume 2, no-3,” kusho uBongz.
Uthe kumanje uziphushela iThanduxolo azoyiqophela i-video kule nyanga. Ubuye waveza nokuthi enkampanini yakhe iGwara Nation, ayivula ngemuva kokushiya iMabala Noise Entertainment maphakathi nenyanga, iqhuba kahle ngoba usayinise abaculi abane.
Uthe useqalile nokupheka i-albhamu yakhe entsha.
“Ngonyaka ozayo kuzobe kubukwa thina onontandakubukwa. Ngisebenza noSir Bubzin, Masandi, omunye umjita oshaya isigubhu saseNigeria namanye amajita,” kusonga yena.