Indodana kaRobbie izolandela uyise
INDODANA yomculi futhi obengumdidiyeli wezingoma wakuleli uRobbie Malinga, ofihlwe izolo, isiveze ukuthi izohamba ezinyathelweni zikayise ukuze igama lakhe lingashabalali kalula.
URobbie Jnr ukusho lokhu enkonzweni yomngcwabo kayise ebiseRhema Bible Church, eGoli izolo.
Izikhulumi ezihlukene zichaze uRobbie ngokuthi ubengumuntu obethanda ukuthuthukisa abanye abantu ukuze baphumelele.
“Ngimzilele kwanela ubaba. Ngikhalile manje ngenele. Njengoba ubaba esedlulile nje ngizothatha la egcine khona. Ngiyabonga kubona bonke omalume akade besebenza nobaba abanginike amazwi okuhlakanipha engizowasebenzisa,” kusho indodana kaRobbie.
Uthe naye uzosiza abantu endimeni yomculo futhi asebenze nabaculi abahlukene.
“Ngizomnakekela umama nodadewethu. Siyabonga kakhulu ngokusikhombisa uthando kulesi sikhathi esinzima,” kuchaza indondana kaRobbie eqale ngokubingelela abangani bayo enkulumeni yayo.
Uyise kaRobbie, uColeman Mgogodla uthe uthando alukhonjiswe ngabantu bakuleli esontweni elinzima empilweni yakhe, ngeke alukhohlwe.
“Ngizobonga nosbari wami okunguyena okhulise uRobbie njengoba ebehlala naye. Igama lendodana yami ngeke linyamalale kalula,” kusho yena.
UThembinkosi ‘’TK’’ Ncinza osebenze kakhulu noRobbie, uhlengezele izinyembezi ekhuluma ngohambo abe nalo nalesi sihlabani.
“Kubuhlungu kushaya enhliziyweni. Kodwa-ke konke sesikushiyela ezandleni zoMdali. URobbie ubewuthanda umculo futhi wenze omkhulu umsebenzi kule ndima, ethuthukisa abaculi abahlukene,” kuchaza yena.
Abaculi abasebenze noRobbie, okukhona kubo uMusa Sokwene, Kelly Khumalo noNaima Kay bacule izingoma abazicula ngokuhlanyela naye uMalinga.
UKelly ucule kanzima njengoba engene esiteji izinyembezi bese zivele zizehlela kucaca ukuthi ugajwe wusizi.
Uhlelo lomngcwabo beluphethwe ngobunono uSbu Leope. Bekugcwele abezinkampani zomculo, abalandeli bebhola kwazise ubelithanda elandela i-Orlando Pirates, izikhulu zepolitiki nabaculi nabanye.
URobbie ufihlwe emathuneni aseWest Park, okungcwatshwa kuwo osaziwayo bakuleli abahlukene.
URobbie ushone ngoKhisimusi ngemuva kokuphathwa umdlavuza wamanyikwe.