‘Maningi amathuba avelayo ngokudlala kwi-CAF’
ISITOBHA seCape Town City, uThamsanqa Mkhize, sikholwa wukuthi ukudlala emqhudelwaneni iCAF Confederation Cup kuzobavulela ithuba lamadlelo aluhlaza bengabadlali.
UMkhize ungomunye wabadlali abakhathule indima ebonakalayo empumelelweni yeCity ezodlala koweCAF kulandela ukuqeda kwayo endaweni yesithathu kwi-log ye-Absa Premiership ekupheleni kwesizini ka-2016/2017. Amanye amaqembu azomela uMzansi emiqhudelwaneni yeCAF yiBidvest Wits engompetha beligi neMamelodi Sundowns eqede endaweni yesibili.
Ngonyaka odlule iSundowns ihlulekile wukuvikela indebe yeChampions League ebikade iyiwine ngo-2016. ISuperSport United izoba yiqembu lesibili elizodlala kwiConfederation Cup ngenxa yokuwina iNedbank Cup ngesizini edlule. Amatsatsantsa ahlulwe kowamanqamu weConfederation Cup ngaphambi kokuphela kuka-2017.
I-The Citizens izoqala imidlalo yeConfederation Cup neYoung Buffalos yaseSwaziland ngesonto lesibili likaFebhuwari.
“Sinethuba lokwenza kahle kwiCaf futhi leli yithuba lethu nabanye abadlali ngoba sizobe siqala ukudlala e-Afrika. Ngenhlanhla mina ngalithola ithuba lokudlala e-Afrika ngidlala eqenjini lesizwe. Lokho kwaba yisiqalo sami nesifundo sami. Abanye bethu bazobe beqala. Bazofunda ukuthi kunjani futhi kudlalwa kanjani e-Afrika, lowo muzwa nje. Iminyango iyavuleka kwabanye abadlali okuyodlala phesheya kwezilwandle,” kusho uMkhize.
“Ngeke ngisho ukuthi kunengcindezi ngenxa yokwenza kahle kwamanye amaqembu aseNingizimu Afrika kwi-CAF kodwa njengomdlali uhlala usebenza ngengcindezi ekukhomba ukuthi kufanele uyinyuse indlela odlala ngayo ukuze uzozuza okufunayo. Asiyi kwi-CAF ukuyogcwalisa isibalo, kumele kube khona esikwenzayo. Njengoba iqembu likwazile ukungena kwiCAF akekho umdlali ongafisi ukuwina okuthize e-Afrika ngoba lokho kuvulelana iminyango kukhulise neqembu. Sifisa ukwenza umehluko e-Afrika.”
ICity isanda kudedela abadlali abaqavile okukhona kubona u-Aubrey Ngoma oseyibamba kwiSundowns noLehlohonolo Majoro osengumgadli weWits. Ngesonto eledlule imemezele ukuthi isayinise isitobha seSundowns uKwanda Mngonyama obekade esebolekiswe izikhawu kwiMaritzburg United.
UMkhize ubekade ehlele indumezulu yomqhudelwano webhola iThami Mkhize Soccer Tournament ngakubo kwaXimba, eManzolwandle Stadium. Iqembu iNew Stars yilona elidle umhlanganiso limuka neziklabhu ezimbili, ijezi, izindondo, namabhola. Leli qembu liphinde ladla umhlanganiso nasesigabeni sika-Under 17.
“Okubalulekile kimina ukuthi abafana abebekade bedlala kuyabakhuthaza yini abenzelwe khona. Ngicabanga ukuthi bajabulile ukudlala phambi kwezihlwele, phambi kwabantu abaziyo ukuthi babuka ikhono labo futhi bangabavulela iminyango ngoba nami ngisuka lapha,” kusho uMkhize.