Akeneme uKaizer ngemiphumela
UKAIZER Motaung ongusihlalo weKaizer Chiefs usebhoboke ngokokuqala ngomsebenzi womqeqeshi weqembu uSteve Komphela osahlulekile ukuwina indebe selokhu efikile eNaturena.
UMotaung akasiye umuntu ojwayele ukukhuluma ngabasebenzi bakhe esidlangalaleni kodwa usephumele obala ngokuphoxeka kwakhe ngokungenzi kahle kweqembu selokhu kufike uKomphela.
“Besithemba ukuthi kuKomphela, osekuyisizini yakhe yesithathu, sizothola imiphumela emihle kodwa lokho bekungakenzeki. Sekuphele amasizini amabili nohhafu manje singayiphakamisi indebe futhi lokho kuphoxa kakhulu. Nokho ngeke siliphonse ithawula. Ngeke senze ngenye indlela kodwa igebe phakathi kwamaqembu ePremiership lincane kakhulu. Kuningi okusazodlalelwa kusekhona i-Absa Premiership neNedbank Cup,” kusho uMotaung kwi-website yeqembu.
Ukukhuluma kanje kukaMotaung kwenza kungabazeke ukuthi izovuselelwa inkontileka kaKomphela ephela ngoJuni.
“Ngiyakholwa ukuthi ikusasa leqembu liqhakazile futhi nginethemba elikhulu lokuthi sihamba ngomgudu okuyiwona. Lokhu kuzethemba kuhambisana nezingququko esifuna ukuzenza eqenjini kulo nyaka omusha,” kuqhuba uMotaung.
UKomphela useke wadlala kweyamanqamu kabili kodwa wehluleka ukuwina indebe. Ngesizini yakhe yokuqala udlale kwifayineli yeMTN 8 lapho eshaywe khona yi-Ajax Cape Town ngo 1-0. Kuyona leyo sizini udlale kweyeTelkom Knockout neMamelodi Sundowns washaywa ngo 3-1. Kule sizini ushaywe yiBidvest Wits ngo 1-0 kwi-semi final yeTelkom Knokcout. IWits iyona egcine iwine le ndebe.
UMotaung uthe kukhona okuhle akubonile eqenjini ngo-2017.
“Kube yinto enhle ukubona abadlali abasebancane benyukela eqenjini elikhulu besuka enkulisa yethu, esingabala kubona uSiyabonga Ngezana, Wiseman Meyiwa, Khotso Malope Bruce Bavuma noNkosingiphile Ngcobo. Lokhu kuchaza ukuthi inhloso yethu ngezinkulisa ishaya emhloleni,” kusho uMotaung.
“Siphinde sathola abadlali abasebancane abafana noDumisani Zuma noTeenage Hadebe. Konke lokhu kwenza ikusasa leqembu libukeke liqhakazile.”
Uvumile uMotaung ukuthi kukhona abadlali okumele badede indawo eqenjini ngoba iminyaka isihambile kubona.
“Sidinga abadlali abazongena ezikhaleni zabo esikhathini esizayo. Isibonelo esihle nje ukusayinisa uLeonardo Castro waseColombia ngaphambi kokuthi kusongwe unyaka odlule. Ungumdlali omuhle futhi sethemba ukuthi uzosheshe enze umehluko eqenjini uma lihlasela,” kubeka uMotaung.
IChiefs kubhekwe ukuthi isayinise uKabelo Mahlasela weBloemfontein Celtic noSiphelele Ntshangase weBaroka FC.
UMotaung uncome abalandeli beChiefs ikakhulukazi abaKwaZulu-Natal abaphuma ngobuningi babo uma iqembu lidlala imidlalo yasekhaya eMoses Mabhida Stadium, eThekwini. IChiefs ivale unyaka ngokuwina ngo 1-0 ishaya i-Ajax Cape Town khona eMabhida.
“Abalandeli bethu bafanelwe ngokungcono kakhulu. Siyabonga kakhulu ngokuthi (balandeli) nihlale nikhona ukugqugquzela iqembu. IChiefs imiswe ngabalandeli bayo futhi yibona abenza sizuze konke esesikuzuzile njengeqembu. Ngethemba ukuthi u-2018 uzosibuyisela ithemba njengeqembu. Abalandeli bethu nemindeni yabo sibafisela unyaka omusha omuhle,” kuphetha uMotaung.
IChiefs kubhekeke ukuthi iwuqale ngegiya eliphezulu u-2018 uma isibhekene neSuperSport United emdlalweni we-Absa Premiership eMbombela Stadium, ngoMgqibelo ngo-6 ntambama. UCastro angase adlale umdlalo wakhe wokuqala egqoke imibala yaMakhosi ngoMgqibelo. Imidlalo ye-Absa Premiership:
NgoLwesihlanu: Bidvest Wits v Free State Stars (Bidvest Stadium, 8pm); Ajax Cape Town v Maritzburg United (Cape Town Stadium, 8pm)
NgoMgqibelo: Polokwane City v Mamelodi Sundowns (Peter Mokaba Stadium, 3.30pm); SuperSport United v Kaizer Chiefs (Mbombela Stadium, 6pm); Orlando Pirates v Baroka FC (Orlando Stadium, 8.15pm); Platinum Stars v Cape Town City FC (Royal Bafokeng Stadium, 8.15pm);
NgeSonto: AmaZulu FC v Chippa United (King Zwelithini Stadium, 3.30pm); Bloemfontein Celtic v Golden Arrows (Dr Molemela Stadium, 3.30pm).