Umehlokaboni ngokufa kukanogada
SEKUKHISHWE umehlokaboni ka-R100 000 kulabo abanemininingwane ngokudutshulwa amahlandla angu11 kukanogada wakwaFidelity, KwaDambuza, eMgungundlovu.
UNksz Nokuthula Olga Zuma (42) kuthiwa ulalelwe unyendle wadutshulwa ngoDisemba 14 esendleleni ebheke emsebenzini.
UMnuz Nathi Zitha ongumyeni kaNksz Zuma (osesithombeni) uveze ukuthi basathukile bewumndeni ngokubulawa kwakhe ngenxa yokuthi abasazi isizathu.
“Uke wadutshulwa amahlandla ayisithupha ngoMashi njengoba ephinde wahlaselwa ngoDisemba. Asazi ukuthi wumuntu onjani ongabulala umuntu wesifazane ngale ndlela ngoba udutshulwe eyogibela imoto yasemsebenzini. Ubewucontroller kwaFidelity ngakho ubelandwa yimoto ngoba ubengena ekuseni kakhulu,” kusho uZitha.
Kuvela ukuthi abahlasele uNksz Zuma bebehamba nge-Avanza emhlophe eyehlisa umuntu owamdubula yase ipaka buqamama nomuzi wakhe ukuze ithathe owayedubula uma eseqede umsebenzi.
Abakhiphe umehlokaboni abathandanga ukudalulwa njengoba bethi benza lokhu ukuze umndeni kaNksz Zuma uthole ubulungiswa.
UZitha ucele noma ngabe wubani onemininingwane ngokuhlaselwa kukaNksz Zuma ukuba athinte amaphoyisa njengoba sekukhishwe nomehlokaboni ka-R100 000. Uthe uNksz Zuma ushiye emhlabeni indodakazi eneminyaka engu-21 namadodana amabili, eneminyaka engu16 neneminyaka engu-12. UColonel Thembeka Mbele wamaphoyisa KwaZulu-Natal uthe amaphoyisa asePlessislaer, eMgungundlovu, aphenya icala lokubulala kanti acela noma ngubani ongaba nemininingwane ukuba athinte amaphoyisa aseduze naye noma iCrime Stop ku-08600 10111.