Ngafaka ugesi wekhadi kodwa ngisathunyelelwa isikweletu
MHLELI: Kwelakho iphephandaba ngivumele ngibeke nasi isikhalo sami. Ngingowesifazane osekhulile ophila ngemali yempesheni. NgoJanuwari ngonyaka odlule, ngaya eSipingo kwaSizakala ngiyocela ukufakelwa ugesi wekhadi phecelezi i-prepaid.
NgoFebhuwari bangithinta bathi bayasemukela isicelo sami. Bathi ukuze bangishitshele kufanele ngikhokhe uR1 900.
Ngakhokha ekupheleni kukaFebhuwari baze bafika phakathi noSepthemba bezowufaka.
Ngakhululeka ngizitshela ukuthi izinkinga zami zokukhokha oR2 800, R2 700, R3 000, R3 300 seziphelile kanti angibuzanga elangeni.
Ngihlala ngedwa ku-4 room kwaBB eMlaza, indodakazi yami ihlala ngaphesheya komgwaqo nomkhwenyana wayo.
Izikhathi eziningi indodakazi ipheka kwayo ingilethele ukudla ngisho nokuwasha banomuntu osizayo, uyena ongiwashelayo a-ayine. Mina nje kwami ugesi usebenza ukukhanyisa ngizibukele neTV. Angiyena nomuntu okhonze itiye, uma kukhona ijusi efrijini kusuke kuphelile.
Ukuthi ngeyani le mali engaka ebengiyikhokhela ugesi angazi. Sengiyifakile i-prepaid kodwa kusafika izincwadi ezithi angikhokhele ugesi. Ngiyalithenga njalo ikhadi. Incwadi efike ngoSepthemba ibithi angikhokhe u-R1 900, Okthoba R2 200, Novemba R2 100, Disemba R3 000.
Mina ugesi engiwukhokha ekhadini nguR240 ngenyanga. Angisazi ukuthi uphi kanti lo gesi namanzi amahhala esathenjiswa kona. Sithwele kanzima eMlaza ngenxa kaMasipala weTheku.