Amaqembu akhokhobela owe-Arrows
UYINYAMA umdlali weLamontville Golden Arrows, uSiphelele Magubane, ofunwa yiCape Town City neBidvest Wits.
Isolezwe lihoshe ngomthombo walo othembekile ukuthi iCity ifuna ukuvala isikhala esivuleke kuhamba u-Aubrey Ngoma ngoMagubane.
“UMagubane wenza kahle futhi usedonse iso lamanye amaqembu agijima kwi-Absa Premiership. I-Arrows yamthola lo mfana ezidlalela eKapa kwiNational First Division kodwa manje usefunwa yiCape Town City neBidvest Wits. Usihlalo weqembu uMato Madlala usemanqika noma amdedele yini. Kodwa mhlawumbe uzomdedela enze imali njengoba enza nakuBongi Ntuli ngesikhathi emdayisela iMamelodi Sundowns,” kusho umthombo.
UMagubane uyiqale kahle isizini. Useshaye amagoli amane emidlalweni ye-Absa Premiership kule sizini. ICity ilahlekelwe nguNgoma ojoyine iSundowns. UNgoma ubefana nomgomgodla weCity ngamagoli akhe abewashaya nabewakhela iqembu. Kuthintwa uJohn Comitis ongusihlalo weqembu ngoMagubane ukhale ngokuthi ngeke akwazi ukuphawula ngaye.
“Ngeke ngikhulume ngomdlali onenkontileka neqembu lakhe. Uma simfuna sizoxhumana ne-Arrows ngoba usenenkontileka nayo,” kusho uComitis. Ucingo lukasihlalo we-Arrows uMadlala beluvaliwe ngesikhathi ethintwa ukuze aphawule ngoMagubane izolo.
ICity imatasa izama ukuvala izikhala zabadlali abahambile. Ishiywe nguLehlohonolo “Major” Majoro. Indawo yakhe iyivale ngomgadli waseKenya uMasound Juma. Lo mgadli uqede njengomshayimagoli ovelele eKenya. Ubasele enethini amagoli angu-17 emidlalweni yeligi.
NgoJuni leli qembu lizohlukana noRobyn Johannes osesayine inkontileka yesibambiso neWits. Indawo yakhe bayivale ngoKwanda Mngonyama ovele esekwiCity.
Leli qembu lizama ukuthola uBrilliant Khuzwayo noKeagan Buchunan kwiKaizer Chiefs. ICity izobhekana nePlatinum Stars emdlalweni wePremiership eRoyal Bafokeng Stadium, ngoMgqibelo ngo-8.15 ebusuku.
Abafana Bes’thende sebevele basayinise uDanny Venter obegjima kwiFree State Stars ongomunye wabadlali abazobanga ijezi noMagubane kuleli qembu. Iphini lomqeqeshi uMandla Ncikazi lithe nakuba befisa ukuqinisa iqembu kodwa ukuntula inkece kweqembu kwenza bangakwazi ukwenza ngendlela abafisa ngayo.
“Sinazo izindawo esifisa ukuziqinisa kodwa besingakanqumi ukuthi sizothatha kubafana abancane eqenjini noma sizokwenza ngenye indlela. Sibheke ukuthi uma ikhona indlela sithathe kubo laba bafana esinabo,” kusho uNcikazi.