UMahachi ucacisa ngokushiya i-Arrows
ISITHANDWA sabalandeli beLamontville Golden Arrows, uKudakwashe Mahachi waseZimbabwe sibhoboke okokuqala ngesimo saso kuleli qembu laseThekwini nezindaba ezisabalele ngokufudukela kwaso eGoli lapho siyojoyina khona i-Orlando Pirates.
Nakuba amahlebezi ekhomba ukuthi uMahachi uya kwiPirates (manje ngoJanuwari) njengoba kuvuleke iwindi lokushintshana ngabadlali kodwa enkulumweni lo mdlali abe nayo naleli phephandaba njengoba bekuvalelwe amaholidi kaKhisimusi, ukubeke kwacaca ukuthi uzohamba uma sekuphele isizini.
Ngesikhathi uMahachi efika kwi-Arrows esuka kwiMamelodi Sundowns ngo-2014 akuzange kucace noma uthengwe ngokugcwele kuyona noma ubebolekisiwe. Lokhu kungacaci kwekusasa lalo mdlali bekwenza umqeqeshi we-Arrows uClinton Larsen ahlale engazi noma uMahachi uzobuya noma cha.
Ngasekuqaleni kwale sizini obengukaputeni wePirates, u-Oupa “Ace” Manyisa, usayine kwiSundowns lavela igama likaMahachi kuthiwa uzosuka kwi-Arrows aye kwiPirates. Ngaleso sikhathi imibiko ngalokhu ibikhomba ukuthi konke sekusele ekutheni uMahachi agibele aye eGoli. Nokho akuzange kwenzeke lokhu ngoba uMahachi ubengakufihli ukungathandi kwakhe ukuya kwiPirates.
“Yiqiniso ukuthi ngiyahamba uma kuphela isizini ngiya kwiPirates. Akusasho lutho ukuthi bengisathanda yini ukuhlala kwi-Arrows noma cha ngoba izingxoxo bezingekho ezingeni lami. Amaqembu womabili akhulume aqeda mina ngatshelwa okuzokwenzeka. Ingithengile iPirates. Ngizohamba uma kuphela isizini esimaphakathi nayo,” usho kanje ekhuluma neSolezwe. Yisitayela sakamuva sabadlali ukuthi babheke kuqala lapho beya khona ukuthi amathuba okudlala angakanani hhayi njengakuqala lapho umdlali ayenele amataniswe neqembu elithathwa njengelikhulu angabe esakubheka okunye ngoba esebuswa wudumo nobukhazikhazi beGoli.
Ephendula kulokhu uMahachi uthe: “Isimo sami sihlukile kulokhu ngoba uRulani (Mokoena) uyena obengifuna futhi lokhu ngikwazi ngoba nangesikhathi esekwiSundowns ubehlale njalo ekulwela ukuthi anginikwe ithuba.
UMahachi uyinsika naseqenjni lesizwe laseZimbabwe elibophele uWillard Katsande, Khama Billiat, Knowledge Musona noTendai Ndoro ukukha nje phezulu.