I-IFP ifuna bajeziswe abaphonsa amatshe
I-IFP ithi kumele bajeziswe kanzima abantu abaphonsa amatshe emabhulohweni kulimale abantu abahamba ngezimoto njengoba lo mkhuba uqhubeka nokwenzeka kweminye imigwaqo yaKwaZulu-Natal.
Umholi we-IFP esiShayamthetho esifundazweni, uMnuz Blessed Gwala, uthe lo mkhuba usuze wadlula nomphefumulo womfana oneminyaka eyisikhombisa nokadadewabo omdala (16) okwaphonswa itshe emotweni ababehamba ngayo emgwaqweni uN2 phakathi kweBallito noThongathi.
“Umthetho kumele unike izinkantolo igunya lokujezisa abadedela amatshe phezu kwezimoto ezidlula phansi kwamabhuluho emigwaqweni enguthelawayeka. Ukulahleka komphefumulo kunganxeshezelwa ngokuthi kukhishwe isigwebo esinzima. Uma isijeziso singalinganiswa nobungako becala umuntu asuke esolwa ngalo, lokho kusho ukuthi ubulungiswa buntekenteke futhi bufile,” kusho uGwala.
Uthe umuntu ojikijela itshe ungumshokobezi kanti isijeziso esinzima esinganqanda lo mkhuba.
“Lezi zigilamkhuba zima phezu kwamabhulohe zitshinge amatshe nezimbokodo ezimotweni ezidlulayo. Uma umisa imoto ziyakuduna. Sikholwa ukuthi lezi zigebengu zisebenzisa le ndlela ukuze zidune abanikazi bezimoto,” kusho uGwala.
Uthe beyi-IFP bayaweseka uMasipala weTheku othi uzoqala uhlelo lokufaka izinsimbi namakhamera emabhulohweni adume ngalo mkhuba ukuze kunqandeke lo mkhuba.
UGwala uthe bacela nohulumeni wesifundazwe ikakhulukazi uMnyango wezokuThutha ukuthi wenze isiqiniseko sokuthi amabhuloho asemigwaqweni engothelawayeka anezinsimbi.
“Sinxusa abashayeli ukuthi baqaphele ikakhulukazi uma beshayela ebusuku. Uma kukhona into abayisolayo, bathinte amaphoyisa ngokushesha,” kusho uGwala.