Awaphele amahlathi kwabaphonsa amatshe emabhulohweni
USUZE wakhipha izidumbu umkhuba omubi ongenisile wokuphonsa amatshe emabhulohweni asemgwaqweni onguthelawayeka uN2.
Phakathi kwabafe ngenxa yalo mkhuba yizelamani, okuyintombazane eneminyaka engu-16 nomfowabo oneyisikhombisa, ezagileka ebhulohweni eliphakathi koThongathi neBallito.
Nakwezinye izifundazwe sihlasele lesi sihlava njengoba sike sabikwa naseMacassar, eCape Town.
Kusolwa ukuthi abagila lo mkhuba basuke befuna ukuphazamisa abashayeli ngokuma emabhulohweni anqamula umgwaqo onguthelawayeka bese bephonsa izinguzunga zamatshe.
Benza lokhu ngoba befuna abashayeli bame besathukile noma behlola umonakalo ezimotweni, bese izinswelaboya ziyagadla zibabambe inkunzi.
Ukwanda kwalo mkhuba sekuvuse uMasipala weTheku namaphoyisa akwaSAPS ukuba uthathe izinyathelo ngokuqinisa ezokuphepha emabhulohweni nasemigwaqweni enguthelawayeka.
Siyawuncoma umasipala namaphoyisa ngokuthatha lesi sinyathelo ukuqinisekisa ukuthi abashayeli nabagibeli baphephile.
Kubuyisa ithemba lokuthi azophela ngempela amahlathi njengoba okhulumela amaphoyisa KwaZulu-Natal uColonel Thembeka Mbhele ethe basebenza kanzima ukuqapha ukuthi lo mkhuba kawusaqhubeki njengoba amaphoyisa eziqaphe zonke izindawo okuphoswa kuzo amatshe.
Kanjalo nomasipala uzibophezele ukuthi uzofaka amakhamera emabhulohweni ukuze zibanjwe lezi zinswelaboya.
Amanye alawa mabhuloho okugilwa kuwo lo mkhuba aseduze nezindawo ezihlala abantu.
Liyihlabe esikhonkosini iPhini leMeya eThekwini, uNkk Fawzia Peer, elithe bazoyivakashela nemiphakathi eyakhele la mabhuloho, ukuyigqugquzela ukuthi ibike uma ibona abantu bephonsa amatshe ezimotweni.
Siyalihlaba nathi lelo khwelo, masibambisane siwumphakathi ukulwa nobugebengu nezigilamkhuba. Ukunqotshwa kwalo mkhuba onobulwane kulele ekubambisaneni nemiphakathi eseduze namabhuloho. Sithi kumele libonakale iqhaza lezobunhloli emaphoyiseni akuleli, kulesi simo esibheke naso.