Angase abhuquze ekhaya othole o-A
USABA ukuthi angase abhuquze ekhaya unyaka wonke uma engalutholi uxhaso lokufunda enyuvesi, umfundi waseNanda odabule o-A abayisikhombisa.
UVuyani Ncube (17) obefunda u-matric eMqhawe High eNanda, uzimisele ukuyokwenza i-Actuarial Science okuyizifundo ezihambelana nezezimali e-University of Cape Town (UCT).
UVuyani obenza izifundo eziyisishiyagalombili, uthole o-A kwiMaths, isiZulu, English, Accounting, Life Orientation, Physics neLife Sciences. Esifundweni sesishiyagalombili okuyiMaritime Economics, uphase ngoB.
Utshele Isolezwe ukuthi wafaka isicelo e-UCT sebemphendulile wamukelwa kodwa akazi ukuthi uzokwenze njani ngoba ngisho imali yokuhlala ngeke ihlangane.
“Ekhaya abazali abasebenzi, baphila ngokudayisa. Kunewele lami elifunda uGrade 11 nodadewethu ofunda uGrade 7 nabo abanezidingo zesikole,” echaza.
UVuyani uthe ubezikhandla, asale yedwa esikoleni efunda. Uveze ukuthi ubesala uma kuphuma isikole aze agoduke ngo7.30 ebusuku. Ubephinde afunde ngasese ngezimpelasonto, abuyele esikoleni esezotadisha yedwa kuze kuhlwe.
Uthisha wakhe uMnuz Sanele Mthembu uthe ubevele elindele ukuthi umfundi wakhe uzogila izimanga ngenxa yokuzimisela kwakhe.
Uthe akangabazi ukuthi nasenyuvesi uzofike aliphakamise igama lesikole sakhe.
Uthishanhloko uMnuz Sipho Mthembu, uthe uVuyani ubuyise isithunzi nokuziqhenya esikoleni. Uthe kwagcina ngo2013 ukuba nomfundi othole o-A abayisikhombisa.
“Omunye umfundi wabathola o-A ngo-2011, bobabili sebengamaAccountant futhi bayabuya bazokhuthaza abafundi bethu. Siyathemba ukuthi izifiso zikaVuyani zizophumelela, akwazi ukuqhubekela enyuvesi,” kusho uthishanhloko.