I-EFF ifuna amajaji kolukaZuma
I-ECONOMIC Freedom Fighters (EFF) iphakamise ukuthi kuqokwe ithimba lamajaji asethathe umhlalaphansi ukuthi alalele icala lokususwa kukaMengameli Jacob Zuma esikhundleni. Yenze lesi siphakamiso emuva kokuthi amalungu ePhalamende edingide imithetho ephathelene nokususwa kukaMengameli esikhundleni.
Kusanda kuvela ukuthi iPhalamende lihlulekile ukuqinisekisa ukuthi umengameli ulandela umthetho. Manje i-EFF inqume ukuthi umengameli asuswe esikhundleni ngasekupheleni kukaMashi, uma wonke amalungu ePhalamende evumelana. Umkhulumeli we-EFF kuzwelonke uDkt Mbuyiseni Ndlozi uthe kufanele kuqale kuqoqwe ubufakazi ngokususwa kukamengameli ngaphambi kokuthi kube nevoti lokungabethembi ubuholi bakhe.
“Siphakamisa ukuthi kuqokwe amajaji asethathe umhlalaphansi amathathu noma amahlanu azobheka imithetho yesigaba 89 sokususwa esikhundleni kukamengameli,” kusho uNdlozi.
Ikomiti ebelilalele lolu daba eliphethwe nguMnuz Richard Mdakane we-ANC livumelene ngokuthi umengameli kufanele azochaza ePhalamende ngaphambi kokuthi amalungu avotele ukungabethembi ubuholi bakhe, okuzokwenziwa ngevoti eliyimfihlo. UNkk Natasha Mazzone weDA uthe ukuba yimfihlo kwevoti kuzonika amalungu ePhalamende ilungelo lokuvota ngonembeza ngaphandle kokulandela imigomo yeqembu.
“Sivota ngendlela esivota ngayo uma siqoka abantu ukuba bangene ezikhundleni noma sebesuswa kufanele ivoti libe yimfihlo.
Lokhu kuzovikela nosomlomo wePhalamende namanye amalungu,” kusho uNkk Mazzone.
UMdakane ugqugquzele amalungu ePhalamende ukuthi eze nezinye iziphakamiso ukuze bazibheke ngoLwesihlanu oluzayo njengoba engavumelananga ngokuthi kuqokwe isigungu samajaji.
Amalungu amaqembu ahlukene asisekile isiphakamiso se-EFF sokuqokwa kwamajaji asethathe umhlalaphansi.
USolwazi Nhlanhlakayise Khubisa weNFP uthe kubalulekile ukuthi umengameli athole ithimba lamajaji elizobheka udaba lwakhe ngaphandle kokwenzelela.
UMnuz Nqabayomzi Kwankwa we-UDM uthe izizathu zokungathenjwa kobuholi bukamengameli kufanele zidingidwe ePhalamende ngaphambi kokuthi ziye emajajini noma ekomitini elizobhekela ukususwa kwakhe esikhundleni.
Ikomiti linqume ukuthi lizodingida imithetho okumele ilandelwe kungakapheli uFebhuwari ukuze uhlelo lokususa umengameli esikhundleni luqale ngoMashi.