I-DA ivivela ukwehlisa ngo-50% ukwesekwa kwe-ANC eKZN
IDEMOCRATIC Alliance (DA) KwaZuluNatal isikuvulile ukuqokwa kwabaholi abazongenela ukhetho lokuhola le nhlangano ngenyanga ezayo. I-DA izimisele ukwehlisa ukwesekwa kwe-ANC kube ngaphansi kuka-50% okhethweni luka-2019.
Ukuphakamisa abaholi kuvulwe ngoMsombuluko kanti kuzovalwa ngoMsombuluko ozayo, izikhundla ezizongenelwa ngezikasihlalo, iphini lakhe namaphini amathathu. Umholi weDA KwaZulu-Natal, uMnuz Zwakele Mncwango, ozongenela ihlandla lesibili, ukwamukele ukuqokwa kwakhe.
Ukukhethwa kobuholi bezifundazwe kwiDA kwenziwa njalo eminyakeni emithathu. UMncwango uthe amaphini amathathu aqokelwa ukulekelela noma ngabe ngubani osuke eqokiwe, awanazo izindawo agxila kuzo asiza ngayo yonke indlela.
“Kubakhona amaphini amathathu anikezwa umsebenzi wubuholi obusha. Izikhundla zawo azithola ngokuvotelwa kwawo, uma umuntu ethole amavoti amaningi uba yiphini lokuqala, kulandela othole amaningana bese kugcina othole ambalwa oba yiphini lesithathu,” kusho uMncwango.
Yize sekusele amasonto ambalwa ngaphambi kwengqungquthela uMncwango uthe akuwona umsebenzi onzima ngoba kudingeka kwesekwe labo abaqokiwe bese kuvotwa.
“Izinhlelo zethu azifani neze-ANC lapho kuyiwa emagatsheni kodwa sidinga ukuthi kuphakanyiswe abantu bese besekwa ngothile ukuze umuntu angenele ukhetho,” kusho uMncwango.
Uthe ubuholi obukhona njengamanje sebuneminyaka emithathu.
“Ngesikhathi singena sasifuna kube khona amakhansela eDA kubo bonke omasipala baKwaZulu-Natal. Sikwenzile lokhu ngoba iDA isikhona ezindaweni zasemakhaya. Sifuna abantu baKwaZuluNatal babumbane bazi ukuthi iDA ikhona,” kusho uMncwango. “Sikholwa wukuthi okwenzeke eTshwane, eJohannesburg naseNelson Mandela Bay kungenzeka KwaZulu-Natal,” kusho uMncwango.