Bayaveva ngelungelo elinikwe umlimi
UBHODLA umlilo umphakathi waseNew Hanover naseCramond ngokunikezwa komlimi osolwa ngokubulala ohlala epulazini ilungelo lokuthi ahlale yedwa esitokisini.
UMnuz Phillip Walter Solomon (65), ongumnikazi wepulazi iCraigs eliyingxenye ye-Otto Bluff Farm, unikezwe yinkantolo yaseNew Hanover ilungelo lokuhlala esitokisini sakhe yedwa ngoLwesibili.
USolomon ubekwe icala lokubulala uMnuz Mothi Ngubane (42) owayesemngcwabeni wakwaLembede. Ummeli wakhe, uMnuz Bret Osborne, ubefake isicelo ngoba ethi uSolomon ushaywa ngezinye iziboshwa futhi lezi eziphakayo zimncisha nokudla.
Uthe uke wahlaselwa nayisiboshwa esigwetshiwe sasho ukumqeda ngesando eNew Prison lapho egcinwe khona.
Umphakathi obusenkantolo izolo ngengoba bekuqhubeka isicelo sebheyili ubuvutha bhe.
UMnuz Bright Mkhize oyikhansela ku-ward 9 kuMasipala waseMshwathi uthe kuyamangaza okwenziwe yinkantolo.
“Sibone kunenhlese yokwenzelela. Akukholeki ukuthi kule nkantolo kuhlanganiswa iziboshwa ezigwetshiwe nezingakagwetshwa. Uma kungathiwa sekwenzekile-ke lokho isando singena kanjani ejele? Siyethemba ukuthi inkantolo uma sekumele ithathe isinqumo ngokuthi iyamnika yini uSolomon ibheyili izokwenza ubulungiswa,” kusho uMkhize.
UMnuz Mlungisi Dlamini oyikhansela ku-ward 1 uthe ngokoMthethosisekelo bonke abantu bayalingana kodwa ezinkantolo kubukeka sengathi lokho akwenzeki.
“Okubekwe ummeli kammangalelwa enkantolo akuzwakali kuyiqiniso. Sinethemba lokuthi uma sekukhishwa isinqumo inkantolo izobheka zonke izinhlangothi,” kusho yena.
UNksz Nomakhosi Mbonambi umndeni wakhe owabaleka epulazini likaSolomon uthe ubona sengathi uSolomon uphethwe ngezandla ezintofontofo.
UMnuz Sibusiso Ntuli weBlack First Land First (BLF), uthe ukuba kuya ngokwabo bebezombuyisela kwezinye iziboshwa ezitokile uSolomon ukuze ahlale azi ukuthi abantu bayalingana. Ngemuva kokuthi umseshi ethule ubufakazi bakhe ngokwenzeka ngosuku okuthiwa kwabulawa ngalo uNgubane, imantshi, uNkk Fikile Luvuno, ithe inkantolo izolalela izethulo zezinhlangothi zombili ngoLwesibili. Kulindeleke ukuthi ikhiphe isinqumo ngalolo suku.