Kuxwayiswe izikole ezibambe izitatimende
UMNYANGO wezeMfundo KwaZulu-Natal usuxwayise izikole ezigweva nezitatimende zabafundi ukuthi ziyeke ukwenza lokhu ngoba kuyicala.
UMnuz Kwazi Mthethwa, okhulumela uNgqongqoshe wezeMfundo esifundazweni uMnuz Mthandeni Dlungwane, uthe abenza lokhu bazongena enkingeni.
UMthethwa uthe ezikoleni okungakhokhwa kuzona akumele kube nabafundi abazobanjelwa imiphumela.
Ezikoleni okukhokhwa kuzona uthe abazali basuke benesibophezelo sokuthi bakhokhe ngoba basuke bezikhethele bona isikole okukhokhwa kusona.
“Ukubamba imiphumela yabafundi kuyicala. Abenza lokho abakuyeke. Abazali abanenkinga yalokhu abaxhumane namahhovisi ezifunda ukuze basizakale,” kusho uMthethwa.
Usho lokhu nje abanye babazali abakhulume neSolezwe bebekhala ngokuthi izingane zabo zibanjelwe imiphumela ngoba zingaziphindiselanga izincwadi zesikole.
Abanye babazali izingane zabo ezifunda eBathembu High eMsinga, bakhale ngokuthi izingane zabo azizitholanga izitatimende zika-matric ngoba izincwadi zingaziphindiselanga.
Omunye wabazali ocele ukungavezwa, uthe ingane yakhe iseThekwini ifuna isikhala sokufunda ngeripoti lamaphakathi nonyaka ngoba ingasitholanga isitatimende.
Uthe ithe iyolanda isitatimende kukhishwa imiphumela ka-matric ngeledlule kwathiwa ngeke bayithole ngoba incwadi ayibuyanga.
“Anginankinga nokukhokhela incwadi kodwa bekumele ingane inikwe isitatimende ukuze ibe izama izikole. Inkinga ngukuthi kuyavalwa emakolishi asikho isitatimende. Kuthiwa asibuye ngelizayo esikoleni njengoba kuvaliwe nje,” kusho lo mzali.
Omunye umzali, ingane yakhe athe ifeyilile, uthe naye uhlangabezane nesifanayo efika ethi uzofuna isitatimende watshelwa ukuthi incwadi ayibuyanga.
“Kunzima ngoba manje isitatimende asikho asikwazi nokubheka ukuthi yiziphi izifundo okumele azithuthukise. Kunzima ngoba akukho lapho sasayina khona ukuthi uma ingane ilahle incwadi nakhu okuzokwenzeka,” kusho umzali.
UMthethwa uthe izikole kumele zakhe imigomo yokuqoqwa kwezincwadi kodwa akekho umfundi okumele anganikwa imiphumela yakhe.