IThala lilule isikhathi sokufakwa kwezomfundaze
ISIKHWAMA esixhasa abafundi ngemali yokufunda ebhange iThala silule isikhathi sokufaka izicelo zoxhaso kubafundi abenze kahle abafuna ukufunda ezikhungweni zemfundo ephakeme kulo nyaka.
Obhekele ezokumaketha kuleli bhange, uMnuz Sandile Xolo uthe sebeqalile ukuhlunga abazothola uxhaso.
“Singajabula uma singakwazi ukuhlinzeka abafundi abaningi ngoxhaso. Siyakhula isibalo sabafuna uxhaso, abafundi bamukelekile ukuthi bafake izicelo kuze kube uJanuwari 12 (kusasa),” kusho uXolo.
Leli bhange linamahlandla amabili okufaka izicelo, elokuqala olwabafundi asebethathiwe ezikhungweni zemfundo.
“Elesibili yilona olumatasa ngoba lwenzeka ngesikhathi lapho abafundi belinde imiphumela yabo ngaphambi kokuba bafake izicelo. Sithole izicelo ezingu-27 ehlandleni lokuqala kanti silindele zande uma sekuyihlandla lesibili,” kusho uXolo.
Lesi sikhwama sasungulwa ngo2016 ukusiza abafundi abangakwazi ukukhokha imali yokubhalisa. Siqale ukuxhasa abafundi abayisithupha ngo-2017. Sisiza abafundi abaqhamuka emindenini ehlwempu.
UXolo uthe ukukhula kwalesi sikhwama kulele ekutheni umfundi ulisebenzisa kanjani ikhadi lakhe le-akhawunti.
“Ayenele indlela esikhula ngayo lesi sikhwama yingakho sigqugquzela abafundi ukuthi bathathe le akhawunti ukuze bakwazi ukusiza ozakwabo. Okwamanje sizokwazi ukuxhasa abafundi ababalelwa ku-20.”
Leli bhange okwamanje linamaakhawunti angu-2 500 aziwa ngamastudents accounts.
U-20% wemali etholwa kuwona uya ekuxhaseni lesi sikhwama.
Uma abafundi sebamukeliwe ezikhungweni zemfundo bayagqugquzelwa ukuthi baluthathe olunye uxhaso oluvelayo.
“Imali yokubhalisa ihluka ngokwezikhungo. Sixhasa abadinga kakhulu uxhaso kuye ngokwemali ekhona.”
Uma une-akhawunti yomfundi yeThala , u-20 cents unikelelwa kulesi sikhwama erandini olisebenzisile. Siyanxusa nabangakwazi ukuthi basixhase lesi sikhwama ngemali ukuthi balule isandla,” kusho uXolo.