Abasebenza ezindlini abanyuselwe imiholo: Neasa
INATIONAL Employers Association of South Africa (Neasa) ikhumbuze bonke abaqashi abanezisebenzi zasendlini ukuthi bazinyusele imali yeholo njengoba uNgqongqoshe wezabaSebenzi, uNkk Mildred Oliphant, ememezele ukuthi mabahole imali ethe xaxa kulo nyaka.
Isikhulu esiphezulu seNeasa, uMnuz Gerhard Papenfus, sithe abasebenzi basezindlini eCape Town, Pitoli, Gauteng nakwabanye omasipala okuhlala khona omacaphunakusale bazohola u-R2 545.22 ngenyanga uma besebenza amahora angu-45 enyangeni.
Ngesonto kufanele bahole u-R587.40 no-R13.05 ngehora.
Ngo-Agasti wonyaka odlule uNkk Oliphant ubeseThekwini ukuzoxoxa nabasebenzi basezindlini ngohlelo lokubanyusela amaholo oluqala kule nyanga.
Abasebenzi basezindlini komasipala abakhulu KwaZulu-Natal bona kufanele bahole u-R11.89 ngehora, kube wu-R534.91 ngesonto no-R2 317.75 ngenyanga.
Abasebenza amahora angu-27 ngenyanga komasipala abakhulu eGauteng, Western Cape, Eastern Cape, North West naseFree State kufanele bahole u-R15.28 ngehora, baholelwe u-R412.60 ngesonto bese behola u-R1 787.80 ngenyanga.
KwaZulu-Natal nakomasipala abancane baseNingizimu Afrika abasebenzi basezindlini abasebenza amahora angu-27 ngenyanga bazohola u-R14.03, ngesonto baholelwe u-R378.83 bese ngenyanga beholelwa u-R1 641.48.
UPapenfus uthe kubalulekile ukuthi abaqashi bayilandele imithetho yabasebenzi ngoba ungqongqoshe wezabasebenzi ushicilele isaziso sokuthi abasebenzi basezindlini bakhushulelwe imali ngoDisemba 15.
“Sikhumbuza abaqashi ukuthi bafake uchatha emiholweni yabasebenzi basezindlini ngokuyalelwa wuNgqongqoshe wezabaSebenzi. Kufanele babe nomholo omusha njengoba kuqala unyaka,” kusho uPapenfus.