Kuxwayiswa ngamaqola adayisa izimoto

AMAPHOYISA aKwaZulu-Natal axwayisa abantu ngezigebengu ezidayisa izimoto ngokufaka izikhangisho emaphephandabeni nasezinkundleni zokuxhumana ezibaqola imali.

Okhulumela amaphoyisa KwaZulu-Natal uLt Colonel Thulani Zwane uthe amaphoyisa aseMgungundlovu abika ukuthi ayenyuka amacala avulwayo ngokuqolwa kwabantu abasuke bebone izikhangiso zezimoto ezidayiswayo.

Uthe abagilwa babona lezi zikhangiso bese befaka imali yokubekisa imoto ngaphandle kokubona imoto noma ukubheka ezinye izinto, ukwenza isiqiniseko sokuthi imoto bazoyithola ngempela.

“Ecaleni lakamuva, umgilwa ufake imali engu-R13 800 kwiakhawunti ethenga iToyota Run X ebikhangisiwe. Ngesikhathi umgilwa esebona imoto ingalethwa ubuzile, wathola ukuthi le nkampani ebiyidayisa ayikho futhi ubeqolwa,” kuchaza uZwane.

Uthe amaphoyisa anxusa umphakathi ukuthi uqaphele uma uthenga izinto ezidayiswa kwiinternet noma emaphephandabeni.

“Abantu kumele baqikelele ukuthi bayabheka ukuthi lokhu okudayiswayo kukhona ngempela nokuthi inkampani edayisayo eyangempela yini, ngaphambi kokuthi bafake imali. Abantu abenza lo mkhuba bafaka ingcindezi kwabathengayo ukuthi baqale bafake imali kwiakhawunti, batshelwe ukuthi baningi abantu abasuke beyifuna le mpahla edayisayo,” kuchaza uZwane.

Uthe ngenxa yokuthi abagilwa basuke beyifuna le mpahla bayakwenza lokhu kanti sebeyaqolwa. UZwane uthe osolayo ukuthi uyaqolwa uma ethenga into ayibone ikhangiswa, uyanxuswa ukuthi athinte amaphoyisa enombolweni yokubika ubugebengu u-086 001 0111.

Amaphoyisa aphinde axwayisa abashayeli bezimoto zakwa-Uber ngokwenyuka kwezigameko zokudunwa kwalezi zimoto eThekwini nezindawo ezakhelene naleli dolobha.

UZwane uthe esigamekweni sakamuva umshayeli wakwa-Uber ubeyoshiya umgibeli eGreewood Park ngesikhathi ehlaselwa ngabasolwa abathathu abebelinde imoto yakhe.

Uthe umshayeli udutshuliwe walimala, kwathathwa imoto. Kuvulwe icala lokuzama ukubulala nelokuduna eGreenwood Park.

UZwane uthe banxusa abashayeli bakwa-Uber ukuthi baqaphele uma behambisa noma beyolanda abagibeli ezindaweni ezehlukene.