Ubunye eqhulwini kwi-ANC: umhlaziyi
UBUMBANO, ukuguqula izisekelo zomnotho nokubuyiswa komhlaba ngaphandle kwezinxephezelo ngezinye zezinto okulindeleke ukuthi zibe seqhulwini enkulumeni kwiJanuwari 8 Statement kaMengameli we-ANC uMnuz Cyril Ramaphosa e-East London, ngoMgqibelo. Lona ngumbono wabahlaziyi bezepolitiki KwaZulu-Natal. Umhlaziyi wezepolitiki esifundazweni, uMnuz Bukani Mngoma uthe akangabazi ukuthi udaba lokuguqula izisekelo zomnotho luzoba ngolunye lweziphezulu enkulumeni kaRamaphosa.
“Uhlelo lokuguqula izisekelo zomnotho lukhona, kuyakhulunywa ngalo. Okusele manje ukuthi lufakwe izinyawo khona sizokwazi ukuthi luzohamba kanjani,” kusho uMngoma.
Uthe olunye udaba uRamaphosa azoluthinta ukuthi kuzoliwa kanjani nenkohlakalo nokulawulwa kombuso yidlanza.
“Kulindeleke futhi ukuthi aphawule kabanzi ngodaba lokubuyiswa komhlaba,” kusho uMngoma.
Uthe enye into elindelekile wukuthi unyaka ka-2018 kuzoqhakanjiswani ngawo njengoba unyaka ka-2017, bekuthiwa unyaka ka-OR Tambo.
Omunye umhlaziyi wezepolitiki eKZN, uMnuz Thabani Khumalo uthe ubona ubumbano luzoba seqhulwini ngoba ayikho into i-ANC engakwazi ukuyizuza ngaphandle kwalo.
“I-ANC ingakhuluma ngohlelo lokuguqula izisekelo zomnotho nokuthathwa komhlaba ngaphandle kwezinxephezelo. Lezi zinto ngeke ikwazi ukuzizuza uma ingabumbene,” kusho uKhumalo.
NoKhumalo uthe udaba lokulawulwa kombuso yidlanzana, akaboni lusala enkulumeni kaRamaphosa.
“Enye into engicabanga ukuthi uzoyithinta ukuthi uzothuthukiswa kanjani umnotho wezwe nokuthi azodalwa kanjani amathuba emisebenzi,” kusho uKhumalo.