Umdwebi wophawu lwe-ANC nethemba ngokubuya kwesithunzi
UMENGAMELI we-ANC ongasekho owabusa isikhathi eside, uMnuz Oliver Tambo ngo1983, wayalela abantu abathathu ukuthi benze kabusha uphawu lwenhlangano.
Ngokusho komunye wabantu abanikwa lo msebenzi, uMnuz Oupa Mokou, uTambo wayefuna ukuthi benze uphawu olunesithunzi futhi enesigqi. Engxoxweni ne-Independent Media, uMokou uthe isithombe sendoda ephethe umkhonto nehawu kwakumele basishintshe, benze uphawu oluzohambisana nawo wonke umuntu.
Uphawu lwe-ANC lwendoda ephethe umkhonto nehawu isasebenza namanje kodwa selusetshenziswa uMkhonto weSizwe.
UMokou uxoxe indaba lapho eke waphelezela uTambo beya eLondon besuka eLusaka. Uthi wayemphathele into ethize okwakungamela ayiphathe.
“Kodwa ngeke ngize ngisho ukuthi yini leyo engangiyiphethe,” kusho uMokou, owenza izifundo zokudweba e-England exhaswe yi-ANC. Uthi watshelwa uTambo besebhanoyini ukuthi kumele asebenzise ikhono lakhe ukwenza uphawu oluzoguqula isithombe senhlangano.
Echaza ngophawu lwenhlangano, uMokou uthe: “Umbala wenhlangano omnyama, oluhlaza noyigolide, umele abantu base-Afrika, umhlaba nezokumbiwaphansi.”
Uthe amasondo asophawini akhombisa ubumbano, umkhonto umele impi yabo eyayibhekiswe kuhulumeni wengcindezelo, ihawu limele ukuzivikela.
UMokou ubekhuluma nephephandaba elisesitebeleni sinye neSolezwe, i-The Star engqungqutheleni yenhlangano eNasrec, eGoli. Uthe isithunzi senhlangano silimele eminyakeni engu 10, edlule.
“Bengiyingxenye yengqungquthela yomakadebebona be-ANC ebiseBoksburg Ekurhuleni ngo-Okthoba, ngaphinde ngaba yingxenye yengqungquthela yokubonisana ebingoNovemba eGoli. Kuzona zombili lezi zingqungquthela, omakadebebona bakugcizelela ukuthi ubuholi bukaMengameli Jacob Zuma buyasilimaza isithunzi senhlangano,” kusho uMokou.
Uthe ukholwa ukuthi ukuqokwa kukaMnuz Cyril Ramaphosa abe ngumengameli omusha wenhlangano kuzowuvuselela umbutho.
“Ngosuku uRamaphosa amenyezelwa ngalo ukuba umengameli omusha, ngangisenxanxatheleni yezitolo ngasekhaya eWonder Park, eTshwane ngigqoke ikepisi nesikibha kukaCR 17. Uyazi kwenzakani? Abantu abahlanu engingabazi beza kimi bezongibingelela bethi qabane, qabane,” kusho uMokou. Uthe lokho kwamkhombisa ukuthi manje sesiyaqala ukubuya isithunzi se-ANC.