Bakhale ngesikhathi kolwekhomishini
NAKUBA kwamukelwe ukumenyezelwa kwekhomishini ezophenya ngokulawulwa kombuso yidlanzana okwenziwe nguMengameli Jacob Zuma kodwa kunesikhalo ngokuthi sesiside isikhathi kulindwe ukuqokwa kwayo.
Le khomishini izoholwa yiJaji Raymond Zondo, eliyiphini likamengameli wamajaji kuleli.
Owayengumvikeli womphakathi, u-Advocate Thuli Madonsela uthe nakuba ekwamukela ukuqokwa kwale khomishini kodwa ukhathazekile ngokuthi sekuphele isikhathi eside ingaqokwa. UZuma wenze lesi simemezelo ngoLwesibili ebusuku wathi ufuna uhulumeni abonakale njengolwa nenkohlakalo.
“Ngijabule ukuthi ugcine eyiqokile ikhomishini nakuba sesiside isikhathi siyilindile. Njengoba sesiside isikhathi kungenzeka obunye ubufakazi bungabe busatholakala. Ubufakazi bamaselula buhlala isikhathi esikaliwe ngakho angazi noma buzobe busatholakala yini.”
UZuma uthe ufune igama lomuntu ozohola le khomishini kumengameli wamajaji kuleli uMogoeng Mogoeng.
Uthe ufuna le khomishini ingashiyi lutho lapho kunezinsolo zenkohlakalo khona.
“Ngiyazi umvikeli womphakathi wakhala ngendaba yokushoda kwezinsiza zokwenza uphenyo, ngithemba ukuthi ikhomishini izofinyelela kuzona zonke izindawo. Ngiyawathemba amajaji ukuthi azowenza ngokungenzeleli,” kusho uZuma.
U-Adv Madonsela wayalela uZuma ukuthi asungule ikhomishini ukuze kuphenywe ngezinsolo abhekene nazo ngobudlelwano anabo nomndeni wakwaGupta.
Izinhlangano ezilwa nenkohlakalo i-Outa neCorruption Watch bakwamukele ukuqokwa kwekhomishini kodwa bakhala ngokuthi kumele engabe kade yaqokwa.
I-Outa ithe uZuma uqoke le khomishini ngemuva kwezinyanga ezingu-14, u-Adv Madonsela akhipha umbiko othinta ukulawulwa kombuso yidlanzana.
Okhulumela iSACP, uMnuz Alex Mashilo uthe sekuyisikhathi sokuthi uZuma ehle esikhundleni ngoba ngeke anqume ukuthi yiziphi izinto ezizophenywa yikhomishini ngoba uyathinteka.
Uthe ingqungquthela ye-ANC ngoDisemba yathi ayisheshiswe le ndaba ekubeni uZuma waya enkantolo efuna kubuyekezwe isinqumo senkantolo iNorth Gauteng High eyayimnqumela izinsuku ezingu-30 ukuthi asungule ikhomishini.
I-DA ifuna uphenyo lwekhomishini lufake ubudlelwano uMengameli anabo nomndeni wakwaGupta, ukusebenzisana kwezinkampani zalo mndeni kanjalo nezingaphansi kukahulumeni, ukulawulwa kwezikhungo zikahulumeni okuyiSars, NPA noKlebe kanjalo nazo zonke izinsolo ezisembikweni ka-Adv Madonsela.
UNgqongqoshe wezamaBhizinisi kaHulumeni uNksz Lynne Brown, ukwamukele ukuqokwa kwekhomishini.
UZondo ohola ikhomishini wazalelwa eXobho, KwaZulu-Natal ngo1960. Uneziqu iB Juris azithola enyuvesi yaseZululand nezimbili azithola e-UKZN nase-Unisa.
Uke wasebenza eLabour Court ngo1997, waba ngumengameli wamajaji kule nkantolo ngo-2000.
Ngo-2011 ubambe njengejaji eNkantolo yoMthethosisekelo kwathi ngo-2017, uZuma wamqoka waba yiphini likaMogoeng evala isikhala sejaji elathatha umhlalaphansi uDikgang Moseneke.