Kuboshwe abadayisa izidakamizwa eThekwini
KUBOSHWE abasolwa abahlanu ngamacala athinta izidakamizwa ezindaweni ezehlukene eThekwini kuleli sonto.
Okhulumela amaphoyisa KwaZulu-Natal, uLt Colonel Thulani Zwane, uthe uphiko lwamaphoyisa aphenya amacala athinta izidakamizwa esifundazweni, abophe abasolwa ababili ePhoyinti ngoLwesibili, ngemuva kokuthola ulwazi lokuthi kunabadayisa izidakamizwa kwelinye lamahhotela eSouth Beach.
Uthe amaphoyisa alandele umkhondo akwazi ukubopha abasolwa ababili athola ne-heroin engu-59 grams engabiza uR20 000.
Kwesinye isigameko kuboshwe abasolwa ababili oneminyaka engu29 no-61 ePhoenix ngoMsombuluko ngesikhathi amaphoyisa egasele kule ndawo. Abasolwa baboshwe eHartside. UZwane uthe kutholwe owesifazane nendoda namaphilisi e-mandrax angu-180 nezingcezu ze-cocaine ezingu- 36 okungadayisa uR21 600. Laba basolwa bavele enkantolo yeMantshi eVerulam, icala lahlehliswa ukuze kuqhubeke uphenyo.
UZwane uthe omunye umsolwa uboshwe ngoMgqibelo eRucklen Place, ePhoenix kanti utholwe namaphilisi e-heroin angu-99 angabiza uR1 980.
UKhomishana wamaphoyisa obambile KwaZulu-Natal, uMajor General Bheki Langa, uncome amaphoyisa ngokubopha abathinteka emacaleni ezidakamizwa.
“Ngiyabonga kakhulu emaphoyiseni ngokusebenza ngokuzinikela ukunqanda isihlava sokwanda kwezidakamizwa esifundazweni,” kusho uLanga.
Unxuse amalungu omphakathi ukuthi ampimpe abadayisa izidakamizwa ngokuthi ababike emaphoyiseni.