Akusalalwa ngenxa yengane elahleke idlala
KUMUNCU emphakathini waseMphelelwa, ePort Edward, nasemndenini wengane eneminyaka emithathu elahleke idlala emnyango.
USthokozo Nkonyeni ugcinwe ngoLwesibili ekuseni ezidlalela ngaphandle kwendlu yakubo.
Umphakathi wakule ndawo kuthiwa awusalali kusukela ngoLwesibili uthungatha le ngane eduke igqoke okubomvu ngenhla, nebhulukwe eliluhlaza.
Isolezwe lithole ukuthi kulethwe nenja yamaphoyisa ekwazi ukuhogela umkhondo kodwa yangasiza.
Osondelene nalolu daba uthe bangaphezu kuka-100 abantu abavela emphakathini abasizayo ukubheka ingane.
“Noma ngubani ongalahlekelwa yingane yakhe ngeke akwazi nokulala ubuthongo. Umphakathi wakule ndawo nomndeni abasabuthi quthu ubuthongo, kufunwa ingane yonke indawo. Akukho lapho kungayiwanga khona ukuyobheka ingane,” kusho yena.
Izolo, Isolezwe alikwazanga ukukhuluma nabazali bengane okuthiwa bagcwele amahlathi babheka ingane yabo.
Onolwazi ngokuduka kukaSthokozo kucelwa axhumane nomphenyi wasesiteshini sasePort Edward, uWarrant Officer Paddy O’Connor ku-0743613571.
Khonamanjalo, amaphoyisa aseMariannhill acela ukufuniswa abesifazane ababili abalahlekile.
UNksz Thina Zibuyile Lembethe (35) ugcine ukubonakala ngoDisemba 23. Waduka eyokhipha imali edolobheni akabange esabuya ekhaya. Wagcinwa egqoke ingubo ende ephuzi nesikhindi esimnyana nejezi elimnyama elinokumhlophe. Ubefake ophaqa.
UNksz Nomfundo Mbuyazi (19) wasePinetown yena ulahleke ngoDisemba 3 ngonyaka odlule.
Yena waduka eya esontweni akaphindange wabuya ekhaya.
Wagcinwa egqoke isiketi esiluhlaza, isikibha esimhlophe nesigqoko sesonto esimhlophe nezicathulo eziphuzi.
Abangaba nolwazi ngalaba besifazane kucelwa bathinte uWarrant officer JB Sthebe ku-073 190 1442 noma ku-031 717 2090/1. Okhulumela amaphoyisa KwaZulu-Natal uLt Colonel Thulani Zwane uthe kuyaphenywa ngokulahleka kwalaba abathathu.