Sekuqale esinye isiteleka sabasebenzi bakwadoti
YIZE ukuqoqwa kukadoti kuqhubeka enkabeni yeTheku kodwa sekuqubuke esinye isiteleka sabasebenzi bohlelo lwe-Expanded Public Works (EPWP) ezindaweni ezakhele iPinetown, okubalwa iHammarsdale nezinye.
Izolo bekushaya umoya ezitaladini zeTheku njengoba abasebenzi abaqoqa udoti bebuyele emsebenzini ngoLwesibili.
Esitatimendeni esithunyelwe nguMnuz Mandla Nsele oyiPhini leNhloko yezokuXhumana kuMasipala weTheku, uveze ukuthi yize udoti uqoqwa enkabeni yeTheku, eMlaza nakwezinye izindawo kodwa ezindaweni ezingaphandle kwePinetown udoti awuqoqiwe.
“Udoti uqoqiwe ezindaweni eziningi kodwa sekuqale esinye iziteleka sabasebenzi be-EPWP esiholele ekutheni udoti ungaqoqwa eKloof, Cato Ridge, Monteseel, Hammarsdale, Gillits, Hillcrest Centre, Crestholme naseInanda Road,” kusho uNsele.
Uthe uMasipala weTheku wenza konke okusemandleni ukuqinisekisa ukuthi isiteleka siyaphela njengoba enezingxoxo nabasebenzi abatelekile.
UNsele ucele abantu ukuthi babekezele ngesikhathi umasipala usazama ukuthola isixazululo.
“Sinalo uhlelo lokuqinisekisa ukuthi izindawo ezingaqoqelwanga udoti zigcinwa zihlanzekile. Sicela abantu babekezele ngoba sinezingxoxo nabasebenzi be-EPWP,” kusho uNsele.
IMeya yeTheku, uNkk Zandile Gumede icele abasebenzi be-EPWP ukuthi baxoxe nezikhulu zikamasipala uma benezinkinga ezithile ngoba yonke inkinga idinga ukuhlalelwa phansi.
“Ngiphatheka kabi uma beteleka baze bachithe udoti enkabeni yeTheku ekubeni ngikhona ukubalalela. Ngiyabacela uma benezikhalo beze kimi ngoba ngizobamukela ngezandla ezifudumele, ngilalele izikhalo zabo bese siphuma nesixazululo,” kusho uNkk Gumede.
Ugqugquzele abafuna umsebenzi ukuthi bafake izicelo hhayi ukuthi batelekele ukuqashwa ngenkani ngoba umasipala unomthetho owulandelayo uma uzovala izikhala zomsebenzi.