Ake kugwenywe ukulungisa inkinga ngenye ematekisini
UKUBUYISWA kokuhamba kwamatekisi eMnambithi kujabulise abaningi njengoba impilo ibinzima kuleya ndawo selokhu kwamiswa amatekisi ngoDisemba wonyaka odlule.
UNgqongqoshe wezokuThutha nokuPhepha koMphakathi KwaZulu-Natal, uMnuz Mxolisi Kaunda, wamisa ukuhamba kwemizila yamatekisi yakuleliya dolobhana ngenxa yokuqothwa kosomatekisi khona. Ushayelwe ihlombe eguqula lesi sinqumo ngoMsombuluko ememezela ukuthi amatekisi ahambela eMnambithi useyawabuyisa kepha asazoqhubeka amiswe lawo amabanga amade.
UKaunda uthe ubuyisa ukuhamba kwamatekisi ngoba ebona sekunokuthula embonini yamatekisi kuleya ndawo futhi sekube nemihlangano nezinhlaka ezithintekayo. Siyancomeka isenzo sikaKaunda sokuzwa isikhalo somphakathi obusuthwele kanzima, kuwumqansa ukuya emsebenzini nasezikoleni.
Abohlaka lokuphathwa kwamabhizinisi kuleliya dolobha kuthiwa nabo bebexwayisa ukuthi kuyaphazamiseka nokusebenza okugcina kuthikameza nomnotho wedolobha, ngenxa yakho belu ukungabi bikho kwamatekisi.
Kuyacaca vele ukuthi eNingizimu Afrika imboni yamatekisi iyinjini yomnotho njengoba inqwaba yabasebenzi igibela wona mihla le. Ukuvalwa thaqa kokusebenza kwawo vele kuzoba nomthelela ongemuhle. Ngakho sinxusa ukuba ongqongqoshe neziphathimandla uma bezothatha isinqumo sokumisa amatekisi, bacubungulisise ukuthi uhlelo lokuthutha umphakathi luzoma kanjani.
Indaba yaseMnambithi ibisiyinkinyankinya, bekumele ngempela ukuthi uKaunda athathe izinyathelo ezinqala kepha akusizi ukuxazulula inkinga ngenye njengoba besilokhu sibika ngosizi lwabantu bakuleya ndawo ngemuva kokumiswa kwamatekisi ngoDisemba.
Sinxusa nabo osomatekisi ukuba ke bazinikele nabo ekulweni nesihlava sezinkabi nokuqothana.
Ukubulala umuntu akukaze kube yisisombululo kepha kungukuxazulula inkinga ngenye enkulu njengoba kugcina sekunodlame oluphendula izingane izintandane namakhosikazi abafelokazi.
Sengathi kungaqhubeka ukuthula eMnambithi, kusabalale kukapakele nakwezinye izindawo sikubone lokhu kuthula esikufisayo embonini yamatekisi.