Asibonge uShenge ngokuvikela ubukhosi
MHLELI: Kwelakho mhleli elifundwa wumhlaba wonke, kulo nyaka make ngiveze lokhu okusezinhliziyweni zethu nabaningi, kepha okunzima ukuba sikusho kuzwe izwelonke ngenxa yesimo sombusazwe waseNingizimu Afrika.
Mangibonge ngeqhaza elibanjwe nguMntwana waKwaPhindangene inkosi Mangosuthu Buthelezi ongundunankulu wesizwe sakithi isizwe samaZulu, ngokwenza ubukhosi bube nesithunzi futhi buhlonipheke ezweni lonke ngisho nangezikhathi ezinzima lapho uhulumeni wobandlululo ayefisa ukubushabalalisa nabanye abampisholo base bejoyine ukububukela phansi.
Shenge, ngithi uNkulunkulu wokhokho asigcinele wena njalo njalo ngoba iqhaza lobukhosi obuhloniphekileyo nobudinga ukuhlonishwa, ulibambe kunzima, ngisho nanamhlanje usayibambile kulo hulumeni wentando yeningi. Simelwe ukuba sikubonge siyizifundazwe zonke, simelwe ukukubonga siyizwekazi laseAfrika nomhlaba wonke.
Ube nelikhulu iqhaza ukukhuthaza obabamkhulu okwase kushatshalaliswa ubukhosi bezizwe zabo ikakhulu esifundazweni iMpumalanga esasibizwa nge-Oos Transvaal kepha Shenge wama namakhosi wawakhuthaza ukuba angazenyezi kepha aziqhenye ngobukhosi besizwe esimpisholo futhi ubulokhu ukhuthaze njalo ubunye phakathi kwawo nezizwe zawo.
Iqhaza lakho asisoze salilibala. Namhlanje ziningi izithelo esezivunwa ngabaningi ngobukhosi kuhulumeni wentando yeningi kepha singekulibale ukuthi umtshali waleyo mbewu nguwe uqobo Shenge.
Ngisho amakhosi akoLimpopo, KwaZulu-Natal, Mpumalanga nakwezinye, azinikela ekwazini umlando wale nto enhle yobukhosi angafakaza.
Sibonga kakhulu Mntwana, sibongela neSilo samabandla wonke ngokuba nondunankulu onjengawe Ngqengelele futhi owaziwa nohlonishwa umhlaba wonke ngokwenza okuhle.
Madoda Simon Yende (uSihlalo wekomidi lomlando
wakwaYende kuzwelonke)