Ufana novuke kwabafileyo ukuze aphilise abanye kwezebhizinisi
UPAMELLA Nkwanyana wacishe wafa ukuze aphinde aphile futhi. Impilo yakhe namhlanje, uthi iwubufakazi futhi idinga noma ngubani ayithole ukuze akwazi ukusondelana noNkulunkulu kunokufuna izinto eziwubukhazikhazi.
UPamella uqale inhlangano ebizwa ngokuthi yiPeople with Vision, ehlela izingqugquthela ezisiza abantu ngamabhizinisi nempilo futhi ebasiza bakwazi ukuhlangana nabantu abazobasiza bafeze amaphupho abo.
Le nhlangano engenzi nzuzo yazaleka ngemuva kokuthi ibhizinisi lakhe nomyeni wakhe elalingenzi kahle, lagcina liwile, lokhu okwadala ukuthi balahlekelwe yikho konke kuhlanganisa nomuzi wabo nokwaholela ukuthi bagcine behlala nezihlobo.
Namuhla uNkwanyana uzimisele ukufundisa abantu ngokuthi bazenzele owabo umnotho ukuze bayeke ukuba yizigqila zezinye izinto.
“Sonke sinempumelelo esizalwa nayo, inkinga ekhona ukungabi nalo ulwazi. Kula inhlangano yami ingenelela khona. Sifundisa siphinde sikhuthaze abantu ukuthi bajule futhi babheke ukuthi ngempela yini ithalente abanalo,” kuchaza uPamella.
Le ntokazi eneminyaka engu-33 eneziqu ze-Accounting yashada ineminyaka engu-19 nosomabhizinisi.
Uthi umyeni wakhe wayehlala egxile emabhizinisini, nowamtshela ukuthi kungcono ashiye iGoli abuyele KwaZulu-Natali ngesikhathi eqeda izifundo zakhe ukuze ayoqala elakhe ibhizinisi.
Laba bashadikazi banamabhizinisi amaningi ahlukene kodwa okuyilona elikhulu futhi elingenisa imali ngelamaloli.
Kuyabonakala ukuthi baphila impilo ephezulu njengoba ifenisha yabo yakhelwe ngaphakathi endlini yabo eyisithabathaba futhi izingane zabo zifunde ezikoleni ezizimele.
“Angifunanga ukuthi umshado ube yinto engivimbayo ukwenza engikufunayo futhi ngangazi ukuthi egazini lami ngingumuntu wamabhizinisi. Okubuhlungu ukuthi emphakathini sifundiswa ukuthi kumele sifunde sithole umsebenzi. Kodwa phansi ekujuleni ngangazi ukuthi kukhulu engingakwenza,” kuchaza yena
Uthe yize kunjalo kodwa ngesikhathi ibhizinisi lingenzi kahle isimo sashuba kakhulu nempilo yabo yaqhekezeka. Impilo yakhe entofontofo yashabalala kungekho ayengakwenza.
Uthe uyi-accountant, uhlezi ebhekene nokwenzeka emalini kodwa okwase kwenzeka wayengakwazi nokukuchaza. Amaloli akhe avele antshontshwa amanye agcina engasebenzi, “kwakuba yinhlekelele ngemuva kwenye, ngagcina ngikweleta R400 000”.
Lo mama wezingane ezintathu wagcina edlelwa izimoto nendlu yakhe yadayiswa ngenxa yesikweletu, kwayena wagcina enokhwantalala, wagcina esola nokuthi bayathakathwa.
“Ngesikhathi kwenzeka konke lokhu ngangikhulelwe ngingabeletha noma kunini, ingane yesithathu, kunjalo nje kwakumele ngifune umsebenzi ngenhlanhla engagcina ngiwuthola, umkhwenyana wami naye wayezama kodwa izinto zingahlangani, okusho ukuthi yimina engangondla ngaleso sikhathi,” kusho yena.
Uthe ngendlela izinto ezazibheda ngayo akekho nomuntu owayefuna ukubaqashisa. Uthe into ayemi kuyona ukuthi uNkulunkulu wayengeke abalahle yize ayesefuna nokuzibulala.
Uthe impilo yakhe yaphinde yaqala phansi yeza kahle kancane kancane, wakwazi ukukhokha izikweletu, waba nemali akwazi ukuyigcina, wakwazi nokungena emabhizinisini.
“’Ngo-2013 ngakwazi ukuthenga amabhizinisi ahlukene okuhlanganisa awokudla, i-casino, ele-stationary, ele-solar heating namanye ngangenza nanoma yini ezongingenisela imali.
“Ngangithi imali izokuba impendulo kuko konke, uNkulunkulu wakhuluma nami, nokwaholela ekutheni ngigcine ngokuwadayisa lawo mabhizinisi engangibona ukuthi awahambisani nezimiso zami nalezo zikaNkulunkulu, ngaqala inhlangano engenzi nzuzo.
“UNkulunkulu wayenezinhlelo ezijulile zokufundisa abanye abantu ngempilo yethu,” kusho yena.