Ovela osizini nendondo yomhlaba
UZISHAYA isifuba unobuhle wakuleli obashaye emakhanda kuMiss Personality abebengenele umncintiswano wonobuhle bezikhungo zezemfundo emhlabeni, iWorld Miss Universities.
U-Asalungile Ngcobo, waseWillow Fontein, eMgungundlovu owenza iBTech kwiManagement eDurban University of Technology (DUT) eseMgungundlovu, ubemele leli kulo mncintiswano obuseCambodia emasontweni amabili edlule.
Uthole indondo ngokubashaya amakhanda ngokudla ingqephu emncintiswaneni, iBest Dressed Award. Izingubo abezigqokile kulo mncintiswano uthe ubezithungelwe abakwaAlfafa.
“Ngijabule kakhulu ukuthi ngeminyaka emithathu ngingenile kulo mkhakha ngifinyelele esigabeni sokumela leli emncintiswaneni omkhulu kangaka. Umncintiswano ubudla lubi, kubonakala ukuthi abawungenele sebenesikhathi eside bekule ndima. Mina ngineminyaka emithathu, ukungenela onobuhle ngikuqale sengiseDUT. Ngifisa ukukhuthaza abanye abantu abazalwa emindenini entulayo njengami, ukuthi noma ngabe isimo sakini sinjani, ungakuvumeli ukuthi sikuvimbele ekufezeni iphupho lakho. Noma ngingawinanga kulo mncintiswano kodwa kukhona engikutholile okukhombisa ukuthi nami bengiyingxenye yomqhudelwano,” kusho yena.
U-Asalungile uthe ukuya eCambodia akubanga lula ngoba ubengenayo imali yezinto eziningi ezidingekayo.
Uma ezohamba kudingeke ukuthi acele uxhaso ezindaweni eziningi.
“Ngiyabonga kubo bonke ababambe iqhaza ngokungikhuthaza, ngokungigqokisa, ngemali nokunginika ithemba lokuthi nami ngingaphumelela. Ngiyethemba ukuthi bayajabula ngokuthi ngibuye nendodo emazweni,” kusho yena.
Le ntokazi ethi ihlala inezinwele zayo zemvelo ithe ikhule ingasebenzisi lutho ekhanda layo ngoba kubo beyingekho imali yokuthenga izinto zokuzicwala.
“Umama ubengigunda ngoba engafuni ngihalele ukufaka imithi yokwelula izinwele ngoba beyingekho imali yokungithengela. Umama nobaba abasebenzi. Imali abebeyithola bebelwela ukuthi sidle,” kusho yena.