Intokazi yaselokishini kuzime wamazwe
IZOMELA ozime baKwaZuluNatal emncintiswaneni omkhulu wozime kuleli ngenyanga ezayo intokazi esencane yaKwaMashu. UThobekile Mngadi (17) ofunda eZaph Dhlomo High uqokwe waba ngomunye wozime abazobanga isicoco sikaMiss Teen Commonwealth South Africa.
Lo mncintiswano uzoba seRoodeport Theatre eGoli, ngoFebhuwari 16. UThobekile useqalile ukwenza amalungiselelo angambeka emathubeni okuthatha lesi sicoco.
Unina kaThobekile, uNkk Yoliswa Mngadi uveze ukuthi ukungenela imincintiswano yozime akuyona into ebigxile kakhulu kuyo indodakazi njengoba ibikhangisela abasiki bengqephu isikhathi esiningi.
Uthe ukungena kwendodakazi yakhe ngaphansi kwenkampani yozime, i-Extreme Management eseDurban North nakho kuyivulele amathuba.
“Sijabule kakhulu ngoba wenza into ayithandayo futhi akhombisa ukuba nekhono layo. Sizimisele ngokumeseka ngazo zonke izindlela. Noma kade eyingenela eminye imincintiswano kodwa ubengajwayele ukungena kweyozime. Ukuqokwa kwakhe kusikhombisile ukuthi angafinyelela kude nalo mkhakha uma eqhubeka nokuzimisela,” kusho uNkk Mngadi.
UThobekile njengamanje umatasa nokwenza eminye yemisebenzi ezokhombisa igalelo lakhe kulo mncintiswano. Kuthiwa kumele kuqambe kushaya isikhathi somcimbi abe esekwazile ukuqoqa uR5 500 esikhwameni sakhe semali aphinde aqoqe izinto azonikela ngazo ekhaya labaswele.
“Useqalile ukuqoqa amaqakelo, izimpahla zokugqoka nokudla afisa ukunikelela ngakho ekhaya lezingane ezikhubazekile. Okwamanje unezindawo ezimbili aziqoqelayo eseGreytown nasePhoenix,” kusho uNkk Mngadi.
Ngonyaka odlule le ntokazi yakwazi ukungena kwiTop 10 kaMiss South Africa Junior obuseGoli ngo-Ephreli.
UPearl useke wahlabana nangezitifiketi ezahlukene kulo mkhakha okubalwa neDiploma yePhilanthropy.