Ubonga Isolezwe osephase u-matric
LITUSA amandla eSolezwe ibhungu laseNanda eselizinze eFlagstaff eliphase u-matric emva kokuthola usizo selilahle ithemba empilweni ngenxa yesimila esasingalapheki esihlathini.
UZanoxolo Vukaphi (23) ngo-2014 wacela usizo kuleli phephandaba emuva kokushiya isikole eshukwa izinhlungu kungafundeki ekilasini.
Ngemuva kokushicilelwa kodaba lwakhe isibhedlela iNkosi Albert Luthuli Central sazibophezela ukumsiza. Saqala ngokumhlinza lesi simila, emuva kwalokho welashwa izinyanga esibhedlela kwaze kwaba uyakwazi ukuphindela esikoleni.
UZanoxolo ngo-Ephreli ka-2015 wangena esikoleni eVukayibambe High, eFlagstaff lapho ephase khona wathola imiphumela emihle njengoba ezuze iBachelor. Izifundo abezenza iSayensi, Maths, History, isiXhosa, Life Orientation, Agriculture neGeography uziphase zonke.
UZanoxolo uthi ubonga nothisha bakhe ngesineke kwazise izinsuku zokufunda bezibuye ziqondane nosuku lokuya esibhedlela lapho esalashwa khona.
“Ngijabule kakhulu ngoba ngifunde kanzima kusukela ngigula. Izinsuku zokuya esibhedlela bezibuye zishayisane nezesikole. Ngibonga Isolezwe, abahlengikazi nomndeni wami ngokungeseka. Ngiyabona nempilo yami izoshintsha. Uma ngithola impendulo eNyuvesi yaseFort Hare ngiyaqala ukufundela ubuthishela,” kusho uZanoxolo.
Phambilini uZanoxolo wayefisa ukuba umshayeli wamabhanoyi kodwa uthi iphupho lakhe selishintshile njengoba ebone indlela othisha abamlekelele ngayo esikoleni.
Naye usenephupho lokuba wuthisha ozoba wusizo entsheni ekhungethwe yizinkinga ezahlukene. Ephetha uveze ukuthi noma ejabule kodwa inhliziyo yakhe inakho ukuphoxeka ngoba uyise owamletha kwiSolezwe ukuzothola usizo, akasekho emhlabeni.
“Ubaba washona ngo-2015 kodwa sengiqalile ukuba ngcono nesibhedlela sesingihlinzile. Ngiyafisa engabe ubesekhona, abone imizamo yami. Kodwa ngibuye ngiziduduze ngoba nginawo umndeni onginakelelayo,” kusho uZanoxolo.