Beza nekhambi lebhizinisi
BAZIMISELE ngokuwuqeda nya umkhuba wamabhizinisi amancane awa kungakapheli iminyaka emithathu esunguliwe osomabhizinisi abancane baKwaZulu-Natal.
Labo somabhizinisi benkampani iDolsden Oracle ezinze eNyuvesi yaKwaZuluNatal ophikweni oluseWestville, isungulwe ngabafundi akade benza izifundo zomnotho kulesi sikhungo ngenhloso yokuhlomisa osomabhizinisi abancane ngamakhono azobasiza ukukhulisa izinkampani zabo.
Abanikazi beDolsden Oracle ngoMnuz Doctor Sangweni, Sakhile Dlamini, Luyanda Ngundze, Lloyd Ngundze noNksz Fezile Sikhakhane.
Ngokusho kukaDlamini, iDolsden Oracle, ivulwe ngokusemthethweni ngoOkthoba wonyaka odlule kanti isiza osomabhizinisi abancane ngezinhlelo zokuthuthukisa izinkampani zabo.
“Sineziqu zomkhakha wamabhizinisi ngoba sifuna ukuthuthukisa umnotho wezwe, siqede umkhuba wezinkampani ezivalwayo kungakapheli iminyaka emithathu zivuliwe ngoba ucwaningo luveza ukuthi u-90% wezinkampani ezincane ezisungulwayo ziyawa,” kusho uDlamini.
UDlamini omatasa nezifundo zeMasters kwiSmall Business Development, uthe bahlukile ezinkampanini ezithuthukisa osomabhizinisi abancane ngoba benza ucwaningo olunzulu uma bezolekelela oqala inkampani.
UMnuz Lloyd Ngundze uneziqu zeBCom Economics kanti umatasa nezeMasters kwiBusiness Management.
UMnuz Luyanda Ngundze umatasa neMasters kwiEconomics, uNksz Sikhakhane umatasa ngeMasters kwiCommerce bese kuthi uSangweni abe matasa nePHD kwi-Economics.
UNgundze (Luyanda) ubalule ukuthi osomabhizinisi abancane banenkinga yokuthola uxhaso, babe nengqinamba yokuphatha imali bese kuba eyokwenza inzuzo.
“Siyacwaninga kakhulu ngaphambi kokuthi siphasise icebo likasomabhizinisi ngoba asifuni akopele ibhizinisi lomunye bese ezitshela ukuthi naye uzophumelela kodwa sigqugquzela ukuthi umuntu nomuntu agxile emkhakheni ohlukile,” kusho uNgundze.
Uthe ophikweni lwabo locwaningo basebenzisana nezinkampani ezinkulu, iminyango kahulumeni kanjalo nosomabhizinisi abancane.
Uthe badinga uhulumeni asondele kubona ngoba banamasu azothuthukisa izinhlelo zakhe zokuthuthukisa umnotho.
UNksz Sikhakhane uveze ukuthi okunye okwenza abantu basabe ukuqala amabhizinisi wukuthi izincwadi ezibachazela ngemithetho yebhizinisi zibhalwe ngesiNgisi kanti lokhu kwenza kube nzima ukuthola izinsiza.
“Sifuna ukubhala izincwadi ezinolwazi oluzosiza osomabhizinisi abancane ngesiZulu nangezinye izilimi zaseNingizimu Afrika.
“Sifuna incwadi esiyibhalayo ikwazi ukufundwa nangumuntu ongenawo u-matric noma iziqu. Ukuqala ibhizinisi akudingi iziqu zemfundo ephakeme kodwa kudinga umbono osebenzayo namakhono,” kusho uNksz Sikhakhane.
Uthe izincwadi bazozikhipha uma sebethole uxhaso kuhulumeni ozozithenga bese umphakathi uzithola mahhala.
UMnuz Lloyd Ngundze ugqugquzele intsha ukuthi ingasabi ukuqala amabhizinisi ngoba imisebenzi ayikho. Amazwi akhe enanelwe nguNksz Sikhakhane odonse ngendlebe abasanda kuphothula u-matric ukuthi bangakhethi izifundo zokucela umsebenzi enyuvesi kodwa benze lezo ezizobasiza ukusungula izinkampani zabo.
“Intsha kufanele isungule amabhizinisi, ingasabi ukufuna ulwazi ngolimi lwayo lwebele ngoba iningi labantu abaphumelelayo emhlabeni jikelele abasikhulumi isiNgisi, bazikhulumela izilimi zabo,” kusho uNksz Sikhakhane. I-Dolsden Oracle inekhasi kwiFacebook lapho intsha nabadinga usizo lwezamabhizinisi bengasizakala khona.