Uhlelo oluzonqanda ukushayisana kwezitimela
AKUSAVUMELEKILE ukuthi izitimela ziyalelwe ngomlomo ukuthi zipake kuphi kodwa kufanele zifakwe kwikhompyutha uma zizoma ukugwema izingozi zokushayisana kwazo.
Lokhu kushiwo nguDkt Nomusa Qunta ongusihlalo wenhlangano ebhekele ukuphepha kwezitimela eNingizimu Afrika izolo emva kokulimala kwabangu-226 kushayisana izitimela ezimbili esiteshini iGeldenhuys, eGermiston, eGauteng ngoLwesibili.
UDkt Qunta uthe izitimela ngeke zisatshelwa ngomlomo ukuthi zipake kuphi kodwa kufanele kusetshenziswe ubuchwepheshe besimanje ukugwema izingozi.
“Sithole ukuthi ingozi yaseGeldenhuys idalwe wukuthi bekunesitimela esimile esiteshini ebesifile kwase kuyalelwa esinye ukuthi singene emzileni ofanayo sashayisa ebesimile. Siyalela iPrasa ukuthi ukuhamba kwezitimela nokumiswa kwazo kulawulwe ngekhompyutha ukuqinisa ezokuphepha,” kusho uDkt Qunta.
Uthe uma iPassenger Rail South Africa (Prasa) iqhubeka nokumisa izitimela ngomlomo izobekwa icala noma bahlawuliswe izigidi zamarandi ngoba kufanele ziphele izingozi.
Mayelana nengozi yangoLwesine oludlule yesitimela seShosholoza Meyl esishayisane neloli kwafa abantu abangu-19, uDkt Qunta uthe basungule ithimba eliyisipesheli elizobheka ukuthi yini edale umlilo obulale abantu.
“Siyazi ukuthi isitimela siphume emzileni kwase kuwa izinqola kwasha. Okwamanje asikakayitholi imbangela yengozi njengoba nomshayeli weloli kutholwe ukuthi akabuthinti utshwala. Ithimba lizophenya ngembangela yengozi nokuthi umlilo wadalwa yini ngoba abantu babulawe wumlilo,” kusho uDkt Qunta.
Abashonelwe yizihlobo eKroonstad basaqhubeka nokwenziwa uhlelo lolibofuzo ukuze bathole izidumbu njengoba zishe zangqongqa.
UNobhala we-United National Transport Union (Untu), uMnuz Steve Harris, uveze ukuthi umshayeli wesitimela esigingqike eKroonstad uthe basinde ngomusa kaNkulunkulu.
UHarris uthe umshayeli ongafuni ukudalulwa igama lakhe nelomsizi wakhe usashaqekile ngale ngozi futhi usalindele ukululekwa ngokwengqondo.