Bagxeka ukubuyiswa kwezikhulu kwa-Eskom
INHLANGANO yezikhulu zezinkampani ezinkulu, iBusiness Leadership South Africa (BLSA), ikugxekile ukubuyiselwa emsebenzini kwezikhulu zakwa-Eskom, okubalwa kuzo uMnuz Matshela Koko obemisiwe emuva kokuthi inkampani yendodakazi yakhe ithole ithenda kule nkampani.
UKoko oyiHead Power Generation kwa-Eskom ubuyele emsebenzini kuleli sonto emuva kokuthi ikomiti eliqondisa ubugwegwe liveze ukuthi limthole engenalo icala. Kuphinde kwabuyiswa uMnuz Prish Govender oyi-Acting Head Group Capital kwa-Eskom.
Esitatimendeni iBLSA ithe ukubuyiselwa kwalezi zikhulu kuyashaqisa futhi sengathi nokuqondiswa kwazo ubugwegwe bekuyinto engekho.
Igxeke uNgqongqoshe wamaBhizinisi kaHulumeni, uNksz Lynne Brown ngokungawenzi kahle umsebenzi.
“Akulungile ukuthi lezi zikhulu zibuyiselwe emsebenzini ekubeni zibhekene nezinsolo ezinzima. UKoko akakaze aphendule ngendlela egculisayo ezinsolweni abekwe zona ikakhulukazi odabeni oluthinta inkampani yendodakazi yakhe esebenzisana no-Eskom,” kusho iBLSA. Ithe ukubuyiselwa kwalezi zikhulu wukudelela abantu baseNingizimu Afrika abagilwe wukulawulwa kombuso yidlanzana nokudliwa kwama-billion amaRandi kwaEskom.
Isole uNksz Brown ngokungabakhathaleli abantu baseNingizimu Afrika ngokulokhu eqoka abangawenzi kahle umsebenzi ezinkampanini zikahulumeni.
“Izinkampani zikahulumeni ziwa ebhekile, akukho akwenzayo ukulungisa isimo. Ulokhu eqhubekile nokufaka amaqabane ezikhundleni ezibalulekile,” kusho iBLSA.
Akusiyona yodwa iBLSA egxeke ukubuyiselwa emsebenzini kwalezi zikhulu ngoba neNational Union of Metal Workers of South Africa (Numsa) ikugxekile yathi kufanele ziphenywe yiPhalamende ngokudliwa kwemali kwa-Eskom.