Kuyalwe osomabhizinisi ngezimvume zokusebenza
KUDONSWE ngendlebe osomabhizinisi baseThekwini ukuthi bavuselele izimvume zokusebenza ezitholakala kuMasipala weTheku kungakafiki uJanuwari 31 nonyaka ngoba uma bengakwenzi lokhu zizovalwa izinkampani zabo.
Esitatimendeni esithunyelelwe abezindaba, iPhini leNhloko yezokuxhumana kuMasipala weTheku uMnuz Mandla Nsele likhumbuze osomabhizinisi ukuthi izimvume zokusebenza zivuselelwa emahhovisi eBusiness Licensing asezindaweni ezihlukene.
UNkk Qondi Liqwa oyimenenja kulolu phiko kuMasipala weTheku uthe amabhizinisi asebenzayo bayawahlola ukuthi anezimvume ezisemthethweni belandela umthetho oyisigaba 15(1) wokulawulwa kwamabhizinisi. Ngaphansi kwalo mthetho uthe usomabhizinisi kufanele njalo ngonyaka aveze ubufakazi bokuthi ibhizinisi lakhe lisasebenza.
“Kwesinye isikhathi uthola ukuthi osomabhizinisi sebengene komunye umkhakha kodwa basebenzisa ilayisensi yebhizinisi elidala. Uma unendawo yokudlela awukwazi ukuyiphendula indawo yokujuxuza ngoba indawo yokujuxuza inemithetho ehlukile yokusebenza,” kusho uNkk Liqwa.
Uthe uma ushintsha ibhizinisi kufanele ufake isicelo esisha. Abayovuselela amalayisensi kufanele baphathe imvume endala, umazisi, izincwadi zenkampani, incwadi evela emaphoyiseni nenye ebizwa nge-proxy.
Eminye imininingwane ngezikhungo ezikhipha amalayisensi osomabhizinisi itholakala kulezi zinombolo: enkabeni yeTheku 031 311 4535, eNyakatho 031 322 1803, eNingizimu yeTheku 031 311 5870 bese kuthi eNtshonalanga yeTheku 031 3116209.