Ubolekiswe esabheke ukulwela ijezi eNaturena
ISITOBHA seKaizer Chiefs esibolekiswe kwiBloemfontein Celtic, uLorenzo Gordinho, sibalisa ngobunzima bokuqonda isizathu sokuhanjiswa eNaturena ekubeni besisabheke ukulwela ijezi ngaphansi komqeqeshi uSteve “Mphathi” Komphela.
UGordinho (23), obekade esephenduke intandokazi yabalandeli ngesizini edlule, uphendukelwe yizinto kwiChiefs emuva kokulimala. Udlale imidlalo eyisikhombisa kwiChiefs kule sizini. Bese elenze elakhe ijezi kwiChiefs ngaphambi kokuthi uKomphela athembele kuDaniel Cardoso, Erick Mathoho, Siyabonga Ngezana noTeenage Hadebe maphakathi emuva.
UGordinho ubolekiswe unyaka kwiCeltic adlale umdlalo wokuqala kuyona ngempelasonto ngesikhathi ihlula iLamontville Golden Arrows ngo 2-1 kowe-Absa Premiership eBloemfontein. Uphambane nesikwibhisi uKabelo “Skipper” Mahlasela olimale ngosuku lokuqala efikile ejimini yeChiefs.
“Bekunzima ukuqonda isinqumo seqembu sokungibolekisa. Ngifikelwe wumunyu kodwa ekugcineni bekufanele ngihloniphe iqembu nomsebenzi wami,” kusho uGordinho.
“Ngicabangile ukuthi ngidinga ukudlala futhi iCeltic iyiqembu elikahle. Ngamukelwe kahle. Ngaphambi komdlalo ne-Arrows umqeqeshi (Veselin Jelusic) ungibuzile ukuthi ngikulungele yini ukudlala ngavumela phezulu. Ngiyajabula ukuthi siwinile emdlalweni wokuqala ngifikile. Ukubolekiswa kwami sengikuthatha njengethuba lokuba senkundleni.”
KwiCeltic, uGordinho, uzobanga ijezi nabadlali abehlukene okukhona kubona uWandisile Letlabika.
Ukubolekiswa kukaGordinho akwehlanga kahle kwabanye abalandeli abakholwa wukuthi ungcono kunabanye abadlali abebanga nabo indawo kwazise ubeshaya namagoli. UGordinho kulindeleke ukuthi aphunge ngempumelelo abagadli beMaritzburg United uma la maqembu esetholana phezulu emdlalweni we-Absa Premiership eHarry Gwala
Stadium, eMgungundlovu, kusasa, ngo-8 ebusuku.
“Kungenza ngithobeke ukwazi ukuthi abalandeli beChiefs bangithanda ngale ndlela. IChiefs iyohlala iyikhaya lami kodwa manje nginomsebenzi wokusiza iCeltic iwine imidlalo. Ukubhekana neMaritzburg ngeke kube lula kodwa kufanele sizibambe ziqine ukuze sibuye namaphuzu esiwadingayo,” kusho uGordinho.