Kuzotholana azihola phambili kwiMDC
KULINDELEKE ukuthi kusiphuke izidindi emdlalweni weMultichoice Diski Challenge (MDC) lapho kuzobe kuthuthana iBloemfontein Celtic neLamontville Golden Arrows okuyiwona maqembu azihola phambili kwi-log.
I-Arrows iyona ehleli esicongweni ngamaphuzu angu-22 ilandelwe yiCeltic esiqoqe angu-19 emidlalweni eyisishiyagalolunye.
Sekusele imidlalo eyisithupha ngaphambi kokuthi kusongwe iMDC bese kuphuma ompetha abasha kanti sekucacela ngisho ingane encane ukuthi iMamelodi Sundowns ngeke isivikele isicoco esinqobe ngesizini edlule.
ISundowns idonsa kanzima njengoba iyibambe endaweni yesibili ukusuka emsileni kwilog.
Kusukela kuqale isizini, iCeltic naBafana Bes’thende bazikhombisile ukuthi bayingozi. Umdlalo wabo useDr Molemela Stadium ngoMgqibelo ngo-10 ekuseni.
IPhunya Sele Sele isihlulwe kabili selokhu kuqale iligi, ilahle ithuba lokuqhwakela ishaywa yiPolokwane City ngo 2-1 emdlalweni wokugcina wonyaka.
I-Arrows yona ayizange iliyeke ithuba yaqumba phansi iChippa United ngomphumela ofanayo.
Iqembu elizowina phakathi kwalawa kungenzeka lizibeke ethubeni lokumuka nendebe. Uma kungagcina kungaBafana Bes’thende abachonywa uphaphe legwalagwala kuyobe kungaqali njengoba sebeke bayiphakamisa ngo-2015. ICeltic yona ilokhu iphunyukwa yimpumelelo kancane njengoba ingelinye lamaqembu abelokhu egqamile kulo mqhudelwano kusukela uqalile ngo-2014.
Womabili amaqembu asekhiqizele amaqembu amakhulu abadlali njengoTshegofaso Mabaso, Neo Maema abaqhulula amagoli noKabelo Dlamini beCeltic. Ohlangothini lweArrows kukhona uNdunduzo Sibiya, Velemseni Ndwandwe no-Andile Fikizolo nabo abadlala naseqenjini elikhulu.
Imidlalo yeMDC yangempelasonto
NgoMgqibelo: Bloemfontein Celtic v Golden Arrows (10am, Dr Molemela Stadium); Maritzburg United v Baroka FC (10am, Harry Gwala Stadium); Ajax Cape Town v Polokwane City (10am, Tsakane Stadium); Orlando Pirates v Cape Town City (12pm, Tsakane Stadium); Platinum Stars v Free State Stars (12pm, Royal Bafokeng Stadium).
NgeSonto: AmaZulu v Bidvest Wits (10am, King Zwelithini Stadium); Mamelodi Sundowns v Chippa United (10am, Tsakane Stadium); SuperSport United v Kaizer Chiefs (12pm, Tsakane Stadium).