ICity ishintshe umqondo ngoKeagan
I-MARITZBURG United ayisayingeni eyomdlali weKaizer Chiefs uKeagan Buchanan olizwa ngendaba ijezi kuMakhosi selokhu afika.
UBuchanan ufike kwiChiefs ekuqaleni kwesizini edlule. Ufike wagixabezwa ngejezi unombolo 10 okuyinombolo ehlonishwayo kunobhutshuzwayo.
Nokho kuze kube yimanje lo mdlali akafiki ezingeni obekubhekwe ukuthi abe kulona emuva kokuthatha unombolo 10.
Usihlalo weMaritzburg uFarook Kadodia utshele Isolezwe ukuthi umqeqeshi weqembu uFadlu Davids useneminye imicabango ngoBuchanan.
“Besimfuna kodwa umqeqeshi useneminye imicabango ngaye. Ngakho asisabhekile ukumsayinisa njengoba kuvulwe iwindi lokushintshana ngabadlali,” kusho uKadodia.
ITeam of Choice ayikho matasa njengoba kuvulwe iwindi lokuhwebelana ngabadlali. Ilahlekelwe nguDenis Weidlich ngemuva kwalokho yathola uThato Tlhone obekwiBidvest Wits oyibamba ngakwesokunxele emuva.
“Asibhekile abadlali abaningi njengoba kuvulwe iwindi lokuhwebelana ngabadlali. UTlhone usebenzisa unyawo lwangakwesokunxele okuyinto ebesingenayo emuva.
Ukufika kwakhe siyethemba kuzosenza siqine nxazonke emuva,” kusho uKadodia.
UBuchanan uke wamataniswa neCape Town City. Amathuba okuthola ijezi abukeka ezoncipha kakhulu kuyena njengoba iChiefs isanda kusayinisa uSiphelele “Stashi” Ntshangase obekwiBaroka FC noKabelo Mahlasela obeyibamba kwiBloemfontein Celtic.
Nokho yize uKadodia eseyichitha ekaBuchanan kodwa imenenja yakhe uPaul Mitchell weSiyavuma Sports Agency ithe isalinde iTeam of Choice mayelana nalo mdlali.
“UKeagan sizama ukuhlanganisa indaba yokuthi abolekiswe. I-Maritzburg ike yasithinta futhi sisalinde yona,” kusho uMitchell.
IChiefs yethule abadlali bayo abasha uMahlasela, uNtshangase noLeonardo Castro obekwiMamelodi Sundowns izolo emini.
Kusasa iMaritzburg izobhekana neCeltic eHarry Gwala Stadium, eMgungundlovu ngo-8 ebusuku.
Izophinde icacise ngabanye abadlali abangase babolekiswe. Umcimbi wokwethula abadlali uzobophela umqeqeshi weChiefs uSteve Komphela nemenenja yeqembu uBobby Motaung.
Lo mcimbi uzoba seKaizer Chiefs Village, eGoli.