Uwele kugesi wafa bedilizelwa
KUSOLWA ukuthi uwele phezu kwentambo kagesi wezinyokanyoka washona owesilisa wasemijondolo yaseNsimbini, ngaseChesterville obezama ukubalekela amaphoyisa abedubula abahlala kule mijondolo, abebevale umgwaqo onguthelawayeka uN2, izolo.
USandile Biyela (43) ohlala emqashweni eduze kwale mijondolo kuthiwa ubesesikhethile isiza azokwakha kuso. Izolo ubeyosiza umngani wakhe ngokuvusa umjondolo obudilizwe ngabophiko lukaMasipala weTheku oluvimbela abadla umhlaba kamasipala, iLand Invassion Unit (LIU) ngoLwesithathu.
Ngalolu suku kuthiwa lolu phiko luthele phansi imijondolo engu-35 okuthiwa beyakhiwe ngokungemthetho. Ngemuva kwalokhu, abahlala kule mijondolo abebedinwe ukuthi kule mijondolo kudilizwe neminye enezinombolo bavale umgwaqo uN2, ebusuku ngo-10.
UMnuz Thulani Nkabinde, ongomunye wabahlali uthe: “Abasebenzi balolu phiko bebenodlame bengafuni lutho, kwale noma sicela incwadi ebavumela ukuthi badilize le mijondolo. Basibuze ukuthi ziphi izincwadi zokuthi sakhe le mijondolo. Sibone kungcono ukuthi sivale umgwaqo ukuze sinakwe. Amaphoyisa afike ekuseni izolo, sesiphumile emgwaqweni,” kusho yena.
Uthe apake ngasemgwaqweni ahamba ngezinyawo acela abantu babili abazokhuluma nawo, abanye bama buqamama. Ngesikhathi esakhuluma nawo kuqhamuke amanye ngakolunye uhlangothi.
“Awazange abuze lutho avulele ngenhlamvu (zenjoloba) kwabebemile belindele ukuthi ngibuye nempendulo. Abantu bahlakazekile babaleka. Abaningi beqe umfula bayocasha ehlathini elingaphesheya. Sithe sisamangele ukuthi kwenze njani kwezwakala omunye umuntu ethi kukhona osedubulekile. Kwaphuthunywa kuye safika ewele emanzini. Okhulumela amaphoyisa esifundazwe, uLt Col Thulani Zwane uthe owesilisa oneminyaka ewu-34 uwele phezu kwentambo kagesi washona ebalekela amaphoyisa abedubula ngezinhlamvu zenjoloba, ehlakaza abahlali ebebenodlame.
“Kuvulwe idokodo esiteshini samaphoyisa eCato Manor,” kusho yena. Ngemuva kwamahora ambalwa kwenzeke lesi sigameko umndeni kamufi kuthiwa ugasele esiteshini samaphoyisa, uthi ufuna isidumbu ngoba ufuna siyothandazelwa wuNyazilwezulu kwaShembe. Kuthiwa uthe ukholwa ukuthi umufi akafile uyaphila.
ULt Col Zwane uthe isidumbu somuntu oshone ngengozi kumele sigcinwe emakhazeni kahulumeni. Sihlolwe bese imiphumela ifakwa edokodweni lophenyo.
“Asikwazi ukudedela isidumbu kungenziwanga lokhu,” kusho yena. UNksz Buyi Biyela udadewabo kamufi uthe umufi ubesesikhethile isiza kule ndawo kodwa ubengakakhi.
Ebuzwa ngokuya kwabo esiteshini beyofuna isidumbu uthe: “Angifuni ukuphawula ngalolu daba futhi udaba lukamfowethu ungalukhiphi ephepheni,” esho evala ucingo.
UMnuz Phumlani Mthembu waBahlali baseMjondolo uthe abaphikisani nokuthi kudilizwe imijondolo eyakhiwe ngokungemthetho kodwa kulokhu umasipala udilize nemijondolo enezinombolo okucasule abahlala kuyo baya emgwaqweni.