Bayaphambana uMadonsela noMkhwebane

U-Adv Mkhwebane uthe uzimisele ukulekelela ikhomishini ngoba kunamacala afaka nehhovisi lakhe.

“Njengoba esebheke ubufakazi obusehhovisi lakhe ucela ukuthi umengameli anikeze ikhomishini amandla okuthi iphenye nezinye izindaba ezithinta ukusetshenziswa kombuso ezinkampanini zikahulumeni, ingagxili embikweni ophambi kwayo kuphela,” kusho uNksz Cleopatra Mosana okhulumela u-Adv Mkhwebane.

Uthe u-Adv Mkhwebane usho lokhu ngoba kungumsebenzi wakhe ukuqinisekisa ukuthi iziphakamiso ezisembikweni wokulawulwa kombuso yidlanzana, ziyenzeka.

Umholi we-UDM uJenene Bantu Holomisa uthe u-Adv Mkhwebane makayeke “ukuzenza isilima” kodwa makafunde iziphakamiso ezazenziwe ngu-Adv Madonsela. “Isinqumo senkantolo siyacacisa ukuthi ijaji kufanele lenzeni. Akadingeki u-Adv Mkhwebane futhi azikho nezinye izindaba ezidinga ukuphenywa.

UNobhala weCouncil for the Advancement of the South African Constitution (Casac) uMnuz Lawson Naidoo uthe akwamukelekile okwenziwa nguAdv Mkhwebane.

“Umyalelo wenkantolo ucacisa ngokusobala okufanele kwenziwe yikhomishini yeJaji Zondo. Kufanele kwenziwe lokho okwashiwo enkantolo hhayi okunye,” kusho uNaidoo.

Uthe iJaji Zondo kufanele aqede umsebenzi wakhe ezinyangeni eziyisithupha, ngakho asikho isikhathi sokubheka ezinye izindaba.

UMqondisi wenhlangano i-Open Secrets uMnuz Hennie Van Vuuren uvumelene noNaidoo ethi asikho isikhathi sokubheka ezinye izindaba.

“U-Adv Mkhwebane akabheke izindaba zehhovisi lakhe, ayeke ijaji lenze umsebenzi walo,” kusho uVan Vuuren.

ISouth African Communist Party (SACP) ithe esikhundleni sokuvikela umphakathi u-Adv Mkhwebane uzifaka ezindabeni ezingamdingi.

“U-Adv Mkhwebane kufanele azithibe ekusebenziseni amandla akhe njengoMvikeli woMphakathi ukugxambukela kwipolitiki. Akushoyo akungeni kulo msebenzi okumele wenziwe yijaji,” kusho uMnuz Alex Mohubetswane Mashilo obhekele ezokuxhumana kwiSACP.