Seziyabuya izimpendulo zabafuna uxhaso kwaNSFAS
LIZOSHONA elanamuhla sebeqalile ukuthola izimpendulo zokuthi bayaxhaswa yini abafake isicelo zokusizwa ngemali yokufunda emanyuvesi nasemakolishi, iNational Students’ Financial Aid Scheme.
Lokhu kuvezwe abalesi sikhwama njengoba kuqalile kuleli sonto ukubhaliswa kwamanye amanyuvesi. Ngelizayo iningi lamanyuvesi okubalwa nawaKwaZulu-Natal ayaqala abhalisa izitshudeni.
Isitatimende salesi sikhwama sithe cishe zingaphezu kuka-80% izicelo esezicutshunguliwe.
“Kusuka ngoJanuwari 12 (namuhla) sizobe sesiqala siphendula abacele uxhaso. Sizimisele ukuhlangabezana nesimemezelo sikaMengameli sokuthi izitshudeni ezihlwempu zifunde mahhala,” kusho isitatimende.
Sithe izitshudeni ebezixhaswe yilesi sikhwama kudingeka ziye emahhovisi aso ezikhungweni ngaphambi ukuyobhalisa.
“Sifuna imiphumela yazo yokugcina ukuze siqhubeke nokubaxhasa. Selokhu lesi sikhwama sasungulwa ngo-1991, sesixhase izitshudeni ezevile ku-3 million.”
UMengameli Jacob Zuma wamemezela ukuthi izitshedeni, imindeni yazo ehola ngaphansi kuka-R350 000 ngonyaka zizofunda mahhala.
Labo abahola kusuka kule mali kuya ku-R600 000 ngeke banyuselwe imali yokufunda emanyuvesi nasemakolishi.
Lezo ezizothola imfundo yamahhala kumele ziye emahhovisi alesi sikhwama ezikhungweni zemfundo lapho zizohambisa khona omazisi bazo.
Omazisi babazali noma labo ababagadile nomazisi babobonke abantu abahlala naleso sitshudeni.
Kudingeka nencwadi yomholo womzali noma isiliphu sempesheni nencwadi yokugula kulabo abakhubazekile.
IPhini likaNgqongqoshe weMfundo ePhakeme, uMnuz Buti Manamela, licashunwe lithi izitshudeni ezizoxhaswa yilesi sikhwama ngeke ziyikhokhe imali yokubhalisa ezikhungweni zemfundo ephakeme.
Uthe lezo zitshudeni ezikweleta lesi sikhwama kulindeleke ukuthi zisikhokhele lesi sikhwama. Nalezo esebezisebenza ezisakweleta lesi sikhwama kumele zikhokhe.